ຫວ່າງກ່ອນນີ້, ໃນກອງປະຊຸມຂ່າວກ່ຽວກັບນະໂຍບາຍທີ່ຈັດຂຶ້ນໂດຍຫ້ອງການຖະແຫຼງຂ່າວລັດຖະບານຈີນ, ທ່ານໂຈ່ຈື້ອູ ຮອງຫົວໜ້າກົມໃຫຍ່ດ່ານພາສີຈີນເຜີຍໃຫ້ຮູ້ວ່າ, ວິທີເຮັດວຽກແບບ "ປະຕູດຽວ" ຈະເຜີຍແຜ່ໄປເຖິງດ່ານພາສີທຸກດ່ານແລະວຽກງານຜ່ານດ່ານໃນທົ່ວປະເທດຈີນຈະຫັນເປັນເອກະພາບກັນພາຍໃນປີນີ້, ວິສາຫະກິດສາມາດເລືອກເອົາສະຖານທີ່ແລະດ່ານພາສີເພື່ອຜ່ານດ່ານຕາມຄວາມສະດວກຂອງຕົນ. "ປະຕູດຽວ", ໝາຍເຖິງ ວິສາຫະກິດສາມາດຍື່ນເອກະສານທີ່ພາກສ່ວນຕ່າງໆຕ້ອງການໃນເທື່ອດຽວໄດ້, ແລ້ວຈະມີລະບົບແຈກຢາຍໃຫ້ພາກສ່ວນຕ່າງໆ ເຮັດວຽກຮ່ວມກັນ. ການຜ່ານດ່ານໃນທົ່ວປະເທດຈີນຫັນເປັນເອກະພາບກັນ, ໝາຍເຖິງ ວິສາຫະກິດສາມາດສຳເລັດທຸກຂັ້ນຕອນຜ່ານດ່ານຢູ່ດ່ານພາສີທຸກດ່ານໃນທົ່ວປະເທດໄດ້, ບັນລຸ "ການຜ່ານດ່ານຢູ່ຫຼາຍບ່ອນ ແລະ ດ່ານໃດກໍ່ຄືກັນ". ຜ່ານການປະຕິຮູບດັ່ງກ່າວ, ຈະຫຼຸດເວລາຜ່ານດ່ານ ໃຫ້ສັ້ນເຂົ້າແລະຫຼຸດຕົ້ນທຶນການຄ້າ, ເຮັດໃຫ້ວິສາຫະກິດການຄ້າກັບຕ່າງປະເທດຮັບຜົນປະໂຫຍດ.
ທ່ານໂຈ່ຈື້ອູ ຮອງຫົວໜ້າກົມໃຫຍ່ດ່ານພາສີຈີນບອກໃຫ້ຮູ້ວ່າ, ມາດຕະຖານຂອງ "ປະຕູດຽວ" ທີ່ກວມເອົາ 9 ບົດບາດ ເຊັ່ນ ການລາຍງານສິນຄ້າ ການລາຍງານພາຫະນະຂົນສົ່ງ ແລະການຈ່າຍພາສີເປັນຕົ້ນ ກຳລັງເລັ່ງລັດສ້າງຢູ່, ປັດຈຸບັນ, ມີ 17 ແຂວງແລະນະຄອນໄດ້ສ້າງ "ປະຕູດຽວ" ໃຫ້ສຳເລັດ, ກ່ອນທ້າຍປີນີ້, ຈະເຜີຍແຜ່ໄປຮອດທຸກດ່ານໃນທົ່ວປະເທດ.
 |
