ຕາມຂ່າວສານຊິ່ນຮວາ: ວັນທີ 28 ພຶດສະພານີ້, ທ່ານ ເຈັມສ໌ ມາທິສ ລັດຖະມົນຕີກະຊວງປ້ອງກັນປະເທດອາເມລິກາກ່າວວ່າ, ຖ້າແຫຼມເກົາຫຼີເກີດການປະທະກັນດ້ວຍກຳລັງອາວຸດ ຈະມີຄ່າຕອບແທນຢ່າງໃຫຍ່ຫຼວງ, ອາເມລິກາຍິນດີຮ່ວມມືກັບຝ່າຍຈີນ ເພື່ອແກ້ໄຂບັນຫານິວເຄຼຍແຫຼມເກົາຫຼີ.
ໃນວິດີໂອໃຫ້ສຳພາດຕໍ່ສື່ມວນຊົນອາເມລິກາທີ່ເຜີຍແຜ່ໃນມື້ດຽວກັນ, ທ່ານມາທິສກ່າວວ່າ, ຖ້າວ່າແຫຼມເກົາຫຼີເກີດການປະທະກັນ, ຈະພາໃຫ້ເກີດສົງຄາມທີ່ຮ້າຍແຮງພິລຶກ. ອາເມລິກາກຳລັງທຳຄວາມພະຍາຍາມຮ່ວມກັບປະຊາຄົມໂລກ ເພື່ອແກ້ໄຂບັນຫານິວເຄຼຍແຫຼມເກົາຫຼີ, ແລະໄດ້ສະແດງທ່າທີຢ່າງຈະແຈ້ງວ່າ ຍິນດີດຳເນີນການຮ່ວມມືກັບຝ່າຍຈີນກ່ຽວກັບເລື່ອງນີ້. ອາເມລິກາກໍ່ຮັບຮອງຄວາມພະຍາຍາມຂອງຝ່າຍຈີນໃນການແກ້ໄຂບັນຫານີ້.
ວັນທີ 26 ເມສາແລ້ວນີ້, ລັດຖະບານອາເມລິກາສະແດງວ່າ, ອາເມລິກາຢາກບັນລຸການປອດນິວເຄຼຍຂອງແຫຼມເກົາຫຼີ ໂດຍຜ່ານການເພີ່ມທະວີການຂວ້ຳບາດດ້ານເສດຖະກິດແລະຄວາມກົດດັນດ້ານການຕ່າງປະເທດຕໍ່ສ.ປ.ປເກົາຫຼີ. ຝ່າຍອາເມລິກາມີທ່າທີເປີດປະຕູຕໍ່ການບັນລຸເປົ້າໝາຍດັ່ງກ່າວໂດຍຜ່ານການເຈລະຈາ, ແຕ່ພ້ອມກັນນັ້ນ, ກໍ່ໄດ້ກຽມພ້ອມເພື່ອປ້ອງກັນຄວາມປອດໄພຂອງອາເມລິກາແລະປະເທດພັນທະມິດຕ່າງໆ.
 |
