ວັນທີ 30 ພຶດສະພານີ້, ທ່ານ ອັນໂຕນີໂອ ກູເຕີເຣັດ ເລຂາທິການໃຫຍ່ອົງການສະຫະປະຊາຊາດໄດ້ອອກຖະແຫຼງການ ໂດຍກ່າວປະນາມຢ່າງຮຸນແຮງຕໍ່ເຫດໂຈມຕີດ້ວຍລະເບີດທີ່ເກີດຂຶ້ນຢູ່ນະຄອນຫຼວງແບັກແດັດຂອງອີຣັກ ແລະ ຫວັງວ່າຈະສາມາດນຳຜູ້ໂຈມຕີມາລົງໂທດຕາມກົດໝາຍໄດ້ຢ່າງວ່ອງໄວ.
ທ່ານ ສຕີເຟັນ ດູຈາຣິກ ໂຄສົກເລຂາທິການໃຫຍ່ອົງການສະຫະປະຊາຊາດໄດ້ອ່ານຖະແຫຼງການໃນການຖະແຫຼງຂ່າວໃນມື້ດຽວກັນວ່າ: ທ່ານ ກູເຕີເຣັດ ໄດ້ກ່າວປະນາມຢ່າງຮຸນແຮງທີ່ສຸດຕໍ່ເຫດໂຈມຕີແບບກໍ່ການຮ້າຍຢູ່ນະຄອນຫຼວງແບັກແດັດ ເຊິ່ງໄດ້ເຮັດໃຫ້ປະຊາຊົນເສຍຊີວິດແລະບາດເຈັບເປັນຈຳນວນຫຼາຍໃນໄລຍະວັນຖືສິນອົດ. ນອກນີ້, ທ່ານ ກູເຕີເຣັດ ຍັງໄດ້ສະແດງຄວາມເສຍໃຈຕໍ່ຄອບຄົວຂອງຜູ້ປະສົບເຄາະຮ້າຍ ພ້ອມທັງຂໍໃຫ້ຜູ້ບາດເຈັບຈົ່ງມີສຸຂະພາບເຂັ້ມແຂງໂດຍໄວ. ຂະນະດຽວກັນ, ທ່ານ ກູເຕີເຣັດ ກໍກ່າວຢ້ຳວ່າ: ອົງການສະຫະປະຊາຊາດຈະສືບຕໍ່ສະໜັບສະໜູນລັດຖະບານແລະປະຊາຊົນອີຣັກທີ່ໄດ້ສຸມທຸກຄວາມພະຍາຍາມໃນການປາບປາມລັດທິກໍ່ການຮ້າຍ.
ຂ່າວແຈ້ງວ່າ: ໃນວັນທີ 29 ແລະ ທີ30 ພຶດສະພານີ້,ຢູ່ນະຄອນຫຼວງແບັກແດັດຂອງອີຣັກຕ່າງໄດ້ເກີດເຫດໂຈມຕີດ້ວຍລະເບີດ ເຮັດໃຫ້ປະຊາຊົນຢ່າງໜ້ອຍ 14 ຄົນເສຍຊີວິດ ແລະ 81 ຄົນບາດເຈັບ.
 |
