ຕາມຂ່າວCRI: ວັນທີ 30 ພຶດສະພານີ້, ທ່ານປຣະຍຸດ ຈັນໂອຊາ ນາຍົກລັດຖະມົນຕີໄທໄດ້ຕ້ອນຮັບການເຂົ້າຢ້ຽມຄຳນັບຂອງທ່ານຝາງເຟິງຮຸຍ ກຳມະການການທະຫານສູນກາງ, ເສນາທິການໃຫຍ່ກອງເສນາທິການປະສົມຄະນະກຳມະການການທະຫານສູນກາງຈີນ.
ທ່ານປຣະຍຸດໄດ້ຕີລາຄາສູງຕໍ່ຜົນສຳເລັດໃນການຊຸກຍູ້ການປະຕິຮູບແລະຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ຂອງທ່ານປະທານສີຈິ້ນຜິງ ທັງໄດ້ກ່າວວ່າ, ໄທຈະສືບຕໍ່ຄົ້ນຄວ້າຄຳເຫັນຂອງທ່ານສີຈິ້ນຜິງກ່ຽວກັບການປົກຄອງປະເທດແລະການຄຸ້ມຄອງລັດ, ຖອດຖອນບົດຮຽນການປະຕິຮູບຂອງຈີນ, ນຳເອົາຍຸດທະສາດພັດທະນາປະເທດຂອງຕົນເຊື່ອມຕໍ່ກັບ "ໜຶ່ງແລວທາງໜຶ່ງເສັ້ນທາງ" ແລະລົງເລິກການຮ່ວມມືໃນທຸກຂົງເຂດລະຫວ່າງສອງປະເທດ. ຂະນະດຽວກັນ ກໍຍິນດີເພີ່ມທະວີການໄປມາຫາສູ່ຂັ້ນສູງກັບຈີນ, ເພີ່ມທະວີການຮ່ວມມືຕ້ານການກໍ່ການຮ້າຍ, ການຝຶກຊ້ອມທະຫານ ແລະອື່ນໆ ເພື່ອຊຸກຍູ້ໃຫ້ສາຍພົວພັນລະຫວ່າງສອງກອງທັບຂະຫຍາຍຕົວຢ່າງຮອບດ້ານ.
ທ່ານຝາງເຟິງຮຸຍກ່າວວ່າ, ພາຍໃຕ້ການຊຸກຍູ້ຂອງທ່ານປະທານສີຈິ້ນຜິງແລະທ່ານນາຍົກລັດຖະມົນຕີປຣະຍຸດ, ສາຍພົວພັນຈີນ-ໄທໄດ້ຂະຫຍາຍຕົວຢ່າງໜັກແໜ້ນ, ຄວາມໄວ້ເນື້ອເຊື່ອໃຈທາງການເມືອງລະຫວ່າງສອງປະເທດເພີ່ມຂຶ້ນຢ່າງບໍ່ຢຸດຢັ້ງ ແລະການຮ່ວມມືໃນຂົງເຂດຕ່າງໆລະຫວ່າງສອງປະເທດກໍນັບມື້ແໜ້ນແຟ້ນ. ທີ່ສຳຄັນພ້ອມຈະຮ່ວມກັບໄທລົງເລິກການຮ່ວມມືຮອບດ້ານລະຫວ່າງສອງກອງທັບຕື່ມອີກ ເພື່ອຕັ້ງໜ້າປະກອບສ່ວນເສີມຂະຫຍາຍສາຍພົວພັນລະຫວ່າງສອງປະເທດ ກໍຄືສັນຕິພາບຂອງພາກພື້ນກໍຄືຂອງໂລກ.
 |
