ການປະທະກັນຢູ່ເມືອງມາລາວີປະເທດຟີລິບປິນເຮັດໃຫ້ຮ້ອຍກວ່າຄົນເສຍຊີວິດແລ້ວ

ຕາມຂ່າວສານຊິນຮວາ: ທ່ານເຣສຕີຕູໂຕ ປາດີລາ ໂຄສົກກອງທັບຟີລິບປິນຖະແຫຼງໃນວັນທີ 30 ພຶດສະພານີ້ວ່າ, ການປະທະກັນຢູ່ເມືອງມາລາວີແກ່ຍາວໄດ້ໜຶ່ງອາທິດແລ້ວນັ້ນເຮັດໃຫ້ມີຜູ້ເສຍຊີວິດເປັນຈຳນວນຫຼາຍ ໂດຍມາຮອດຕອນຄ່ຳວັນທີ 29 ພຶດສະພາ ມີຜູ້ເສຍຊີວິດແລ້ວ 104 ຄົນ, ໃນນັ້ນເປັນທະຫານແລະຕຳຫຼວດ 20 ຄົນ, ປະຊາຊົນ 19 ຄົນ ແລະກຸ່ມປະກອບອາວຸດຕໍ່ຕ້ານລັດຖະບານ 65 ຄົນ, ນອກນີ້ ຍັງມີທະຫານແລະຕຳຫຼວດອີກ 72 ຄົນບາດເຈັບ.

ທ່ານປາດີລີກ່າວວ່າ, ເຈົ້າໜ້າທີ່ທະຫານຍັງຈະສືບຕໍ່ກວາດລ້າງກຸ່ມປະກອບອາວຸດ "ອົງການມາວເຕ" ທີ່ຍັງຫຼົງເຫຼືອຢູ່ເມືອງມາລາວີ ເພື່ອຫຼີກເວັ້ນບໍ່ໃຫ້ເກີດຄວາມເສຍຫາຍທັງຕໍ່ບຸກຄົນແລະຊັບສິນຕື່ມອີກ. ຂະນະດຽວກັນກໍຮຽກຮ້ອງໃຫ້ກຸ່ມປະກອບອາວຸດຕໍ່ຕ້ານລັດຖະບານອອກມາຍອມຈຳນົນໂດຍໄວ. ທ່ານຍັງກ່າວຕື່ມວ່າ, ເຈົ້າໜ້າທີ່ທະຫານຈະພະຍາຍາມຊ່ວຍປະຊາຊົນທີ່ຍັງຢູ່ໃນເມືອງມາລາວີຕໍ່ໄປ.