ໃນການຖະແຫຼງຂ່າວທີ່ຈັດຂຶ້ນໃນວັນທີ 31 ພຶດສະພາຜ່ານມາ, ທ່ານນາງ ຮວ້າຊຸ່ນຢີງ ໂຄສົກກະຊວງການຕ່າງປະເທດຈີນໄດ້ຮຽກຮ້ອງອີກເທື່ອໜຶ່ງໃຫ້ອາເມລິກາແລະ ສ.ເກົາຫຼີ ຢຸດຕິແລະຍົກເລີກການຕິດຕັ້ງລະບົບການປ້ອງກັນລູກສອນໄຟຫຼືທັດ.
ຂະນະທີ່ຫວ່າງມໍ່ໆມານີ້, ທ່ານ ມູນເຈອິນ ປະທານາທິບໍດີ ສ.ເກົາຫຼີ ໄດ້ຮັບຟັງການລາຍງານກ່ຽວກັບລະບົບການປ້ອງກັນລູກສອນໄຟຫຼືທັດ, ນອກຈາກການຕິດຕັ້ງການຍິງເຄື່ອນທີ່ຂອງລະບົບດັ່ງກ່າວ 2 ຊຸດຢູ່ລັດຊິນໂຈຂອງສ.ເກົາຫຼີແລ້ວ, ຖານຍິງອີກ 4 ຊຸດກໍໄດ້ສົ່ງມາຮອດ ສ.ເກົາຫຼີ ແລ້ວ. ຈາກນັ້ນ,ທ່ານ ມູນເຈອິນ ກໍກ່າວດ້ວຍຄວາມເດັດຂາດວ່າຕ້ອງສືບສວນເຫດການດັ່ງກ່າວຢ່າງລະອຽດ.
ທ່ານນາງ ຮວ້າຊຸ່ນຢີງ ກ່າວເຖິງເລື່ອງນີ້ວ່າ: ອາເມລິກາຕິດຕັ້ງລະບົບທັດຢູ່ ສ.ເກົາຫຼີ ໄດ້ທຳລາຍຄວາມໝັ້ນຄົງທາງຍຸດທະສາດຂອງຈີນຢ່າງໜັກໜ່ວງ ທັງທຳລາຍຄວາມສົມດຸນທາງຍຸດທະສາດຂອງພາກພື້ນ ທີ່ສຳຄັນມັນບໍ່ເປັນປະໂຫຍດຕໍ່ການບັນລຸເປົ້າໝາຍປອດນິວເຄລຍໃນແຫຼມເກົາຫຼີ, ສັນຕິພາບແລະສະຖຽນລະພາບຂອງພາກພື້ນ ເຊິ່ງຈີນເດັດດ່ຽວຄັດຄ້ານ ເລື່ອງນີ້ ໂດຍ"ພວກຂ້າພະເຈົ້າໄດ້ຮຽກຮ້ອງອີກເທື່ອໜຶ່ງໃຫ້ອາເມລິກາແລະ ສ.ເກົາຫຼີ ຈົ່ງຢຸດຕິແລະຍົກເລີກການຕິດຕັ້ງລະບົບທັດຢ່າງເດັດຂາດ.