ຂປລ. ສະມາຄົມສິລະປິນລາວ, ຫໍສະໝຸດແຫ່ງຊາດ, ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ, ກົມມັດທະຍົມສຶກສາ ກະຊວງສຶກສາທິການ ແລະ ກິລາ ແລະ ລັດວິສາຫະກິດຫັດຖະກໍາປະດິດຈໍາປີລາວ ໄດ້ຮ່ວມກັນລົງນາມ ສ້າງໂຄງການລະດົມທຶນ ຊ່ວຍເຫລືອຖົງປຶ້ມ ແລະ ອຸປະກອນການຮຽນໃຫ້ນ້ອງນັກຮຽນປະຖົມ ແລະ ມັດທະຍົມສຶກສາ ໃນຂອບທົ່ວປະເທດ ໄລຍະ 5 ປີ 2017-2022, ຊຶ່ງໂຄງການດັ່ງກ່າວ ເນັ້ນຊ່ວຍເຫລືອນ້ອງນັກຮຽນປະຖົມ ແລະ ມັດທະຍົມສຶກສາ ທີ່ຢູ່ເຂດຫ່າງໄກສອກຫລິກ.
ທ່ານ ດວງຈໍາປີ ສຸດທິສັກ ຮອງຫົວໜ້າກົມສິລະປະການສະແດງ, ຮອງຫົວໜ້າຄະນະບໍລິຫານຫ້ອງການ ສະມາຄົມສິລະປິນລາວ ກ່າວວ່າ:ການຈັດຕັ້ງປະຕິບັດໂຄງການ ລະດົມທຶນ ຊ່ວຍເຫລືອຖົງປຶ້ມຮຽນ ແລະ ອຸປະກອນການຮຽນ ໃຫ້ນ້ອງນັກຮຽນຊັ້ນປະຖົມ ແລະ ມັດທະຍົມທົ່ວປະເທດ. ຈຸດປະສົງ ແມ່ນເພື່ອສ້າງກອງທຶນ ໃຫ້ແກ່ກະຊວງສຶກສາທິການ ແລະ ກິລາ ໃນການສົ່ງເສີມການສຶກສາ ໃນໂຮງຮຽນປະຖົມ ແລະ ມັດທະຍົມ, ສ້າງກອງທຶນໃຫ້ແກ່ຫໍສະໝຸດແຫ່ງຊາດ ເພື່ອນໍາເອົາປຶ້ມອ່ານ ໄປຊ່ວຍເຫລືອຫໍສະໝຸດ ຢູ່ໂຮງຮຽນເພື່ອສົ່ງເສີມການອ່ານ, ສ້າງກອງທຶນໃຫ້ແກ່ສະມາຄົມສິລະປິນລາວ. ກົມສິລະປະການສະແດງ ເພື່ອພັດທະນາບຸກຄະລາກອນ ແລະ ວຽກງານການສົ່ງເສີມວັດທະນະທໍາ ຄຽງຄູ່ກັບວຽກງານສຶກສາ ເຊິ່ງໂຄງການຊ່ວຍເຫລືອດັ່ງກ່າວ, ໃນໄລຍະຈັດຕັ້ງປະຕິບັດ ຈະຊ່ວຍເຫລືອໃນ 2 ເມືອງ ຄື: ເມືອງສັງທອງ ແລະ ເມືອງປາກງື່ມ ນະຄອນຫລວງວຽງຈັນ, ຫລັງຈາກນັ້ນໂຄງການຈະລົງຊຸກຍູ້ຊ່ວຍເຫລືອ ໂຮງຮຽນທີ່ທຸກຍາກຫ່າງໄກສອກຫລີກ ເປັນໂຮງຮຽນທີ່ນອນຢູ່ໃນບູລິມະສິດ ຂອງລັດຖະບານໃນ 49 ຕົວເມືອງເຊິ່ງຄາດວ່າ ຈະມີນັກຮຽນປະມານ 1 ລ້ານກວ່າຄົນ ຈະໄດ້ຮັບຜົນປະໂຫຍດຈາກໂຄງການດັ່ງກ່າວ.
ພິທີລົງນາມລົງນາມ ໂຄງການລະດົມທຶນ ຊ່ວຍເຫລືອຖົງປຶ້ມ ແລະ ອຸປະກອນການຮຽນ ໃຫ້ນ້ອງນັກຮຽນປະຖົມ ແລະ ມັດທະຍົມທົ່ວປະເທດໄດ້ຈັດຂຶ້ນ ໃນວັນທີ 31 ພຶດສະພາ 2017 ຢູ່ຫໍວັດທະນະທໍາແຫ່ງຊາດ, ໂດຍມີ ທ່ານ ນາງ ສີສຸກ ວົງວິຈິດ ຫົວໜ້າກົມມັດທະຍົມສຶກສາ ກະຊວງສຶກສາທິການ ແລະ ກິລາ, ທ່ານ ດວງຈໍາປີ ສຸດທິສັກ ຮອງຫົວໜ້າກົມສິລະປະການສະແດງ, ຮອງຫົວໜ້າຄະນະບໍລິຫານຫ້ອງການ ສະມາຄົມສິລະປິນລາວ,ທ່ານ ນາງ ຂັນທະມາລີ ຍັງນຸວົງ ຜູ້ອໍານວຍການຫໍສະໝຸດແຫ່ງຊາດ ແລະ ທ່ານ ໄພລັດ ຈະເລີນທັງສົມບັດ ຜູ້ອໍານວຍການລັດວິສາຫະກິດ ຫັດຖະກໍາປະດິດຈໍາປີລາວ, ໂດຍການເຂົ້າຮ່ວມເປັນສັກຂີພິຍານ ຂອງທ່ານ ບົວເງິນ ຊາພູວົງ ຮອງລັດຖະມົນຕີກະຊວງຖະແຫລງຂ່າວ, ວັດ ທະນະທໍາ ແລະ ທ່ອງທ່ຽວ, ພ້ອມດ້ວຍພາກສ່ວນທີ່ກ່ຽວຂ້ອງ ເຂົ້າຮ່ວມ.