ຕາມຂ່າວສານຈີນ: ຫ້ອງການຄຸ້ມຄອງໜີ້ສິນສາທາລະນະຂອງໄທ ເປີດເຜີຍຂໍ້ມູນຫຼ້າສຸດວ່າ, ມາຮອດທ້າຍເດືອນເມສາຜ່ານມາ, ລວມຍອດໜີ້ສິນສາທາລະນະຂອງປະເທດຕົນ ມີເຖິງ 6260 ຕື້ບາດ ກວມ 42,64% ຂອງລວມຍອດຜະລິດຕະພັນພາຍໃນຫຼື GDP.
ຍອດໜີ້ສິນສາທາລະນະດັ່ງກ່າວເປັນສ່ວນຂອງລັດຖະບານມີປະມານ 4820 ຕື້ບາດ, ທີ່ເຫຼືອນັ້ນ ແມ່ນໜີ້ສິນຂອງລັດວິສາຫະກິດ, ສະຖາບັນການເງິນຂອງລັດທີ່ລັດຖະບານຮັບປະກັນ ແລະອົງການລັດຖະບານ.
ທັງນີ້ ເມື່ອທຽບໃສ່ເດືອນມີນາຜ່ານມາແລ້ວ, ໜີ້ສິນສາທາລະນະ ໄດ້ເພີ່ມຂຶ້ນ 101 ຕື້ 370 ລ້ານບາດ.
ນັກວິເຄາະເຫັນວ່າ, ລັດຖະບານໄທນຳໃຊ້ຂຸມການເງິນມາກະຕຸກການພັດທະນາເສດຖະກິດຢ່າງວ່ອງໄວ ເພື່ອຫຼຸດຜ່ອນຜົນກະທົບຈາກການປັ່ນປ່ວນຂອງເສດຖະກິດພາຍນອກ. ແນວໃດກໍດີ, ໄປພ້ອມກັບການລົງທຶນຂອງລັດຖະບານທີ່ນັບມື້ນັບເປັນຮູບປະທຳ ແລະເກີດປະສິດທິຜົນທາງເສດຖະກິດຢ່າງຕໍ່ເນື່ອງນັ້ນ ຈະເຮັດໃຫ້ລາຍໄດ້ງົບປະມານເພີ່ມຂຶ້ນ ແລະເມື່ອຮອດເວລານັ້ນ, ສະພາບລາຍຮັບລາຍຈ່າຍຂອງໄທກໍຈະດີຂຶ້ນກວ່າເກົ່າ.
 |
