ວັນທີ 1 ມິຖຸນານີ້, ທ່ານສີຈິ້ນຜິງ ປະທານປະເທດຈີນໄດ້ສົ່ງໂທລະເລກເຖິງທ່ານໂມຮາເມັດອາສລັຟການີ ປະທານາທິບໍດີອັຟການິສະຖານເພື່ອສະແດງຄວາມເຫັນໃຈຫຼັງເກີດເຫດການໂຈມຕີດ້ວຍລະເບີດລົດ ຢູ່ນະຄອນຫຼວງກາບູນປະເທດດັ່ງກ່າວ ເນື້ອໃນໂທລະເລກຂຽນວ່າ: ຕົກໃຈເມື່ອໄດ້ຍິນຂ່າວເກີດເຫດໂຈມຕີດ້ວຍລະເບີດລົດຢ່າງຮ້າຍແຮງຢູ່ນະຄອນຫຼວງກາບູນເຊິ່ງເຮັດໃຫ້ມີຜູ້ເສຍຊີວິດແລະບາດເຈັບຢ່າງຫຼວງຫຼາຍ. ຂ້າພະເຈົ້າຂໍຕາງໜ້າລັດຖະບານແລະປະຊາຊົນຈີນແລະໃນນາມສ່ວນຕົວສະແດງຄວາມໄວ້ອາໄລຢ່າງສຸດຊຶ້ງຕໍ່ຜູ້ເສຍຊີວິດແລະສະແດງຄວາມເຫັນໃຈດ້ວຍຄວາມຈິງໃຈຕໍ່ຜູ້ບາດເຈັບພ້ອມຄອບຄົວຜູ້ເສຍຊີວິດ.
ເນື້ອໃນໂທລະເລກຍັງເນັ້ນວ່າ: ຈີນຄັດຄ້ານລັດທິກໍ່ການຮ້າຍທຸກຮູບແບບແລະປະນາມຢ່າງຮຸນແຮງຕໍ່ເຫດການນີ້ທັງຍິນດີຮ່ວມກັບປະຊາຄົມໂລກສະໜັບສະໜູນລັດຖະບານແລະປະຊາຊົນອັຟການິສະຖານໃນການປ້ອງກັນແລະປາບປາມລັດທິກໍ່ການຮ້າຍເພື່ອປົກປັກຮັກສາຄວາມໝັ້ນຄົງແລະສະຖຽນລະພາບຂອງປະເທດດັ່ງກ່າວ.