ຕາມຂ່າວສານຊິນຮວາ: ວັນທີ 1 ມິຖຸນານີ້, ບໍລິສັດຮວາເຫວີຍຈີນໄດ້ປະກາດສ້າງຫ້ອງທົດລອງເປີດເຜີຍແຫ່ງທີ 7 ຂອງໂລກຢູ່ນະຄອນຫຼວງບາງກອກປະເທດໄທ ເພື່ອສ້າງເວທີປະດິດສ້າງທີ່ໃຫ້ແກ່ລູກຄ້າແລະບໍລິສັດໄດ້ນຳໃຊ້ຫົວຄິດປະດິດສ້າງ ແລະຊ່ວຍໄທເລັ່ງຂະບວນການຫັນເປັນແບບດີຈີຕອນ.
ທ່ານສົມຄິດ ຈະຕຸສີພິທັກ ຮອງນາຍົກລັດຖະມົນຕີໄທໄດ້ກ່າວໃນພິທີເປີດຫ້ອງທົດລອງວ່າ, ການພັດທະນາຂອງປະເທດຕົນຕ້ອງເຊື່ອມຕໍ່ກັບຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ", ໃນນັ້ນ ການກໍ່ສ້າງພື້ນຖານໂຄງລ່າງແລະຂໍ້ມູນຂ່າວສານດີຈີຕອນມີຄວາມສຳຄັນທີ່ສຸດ. ໃນໂອກາດນີ້ຂໍສະແດງຄວາມຂອບໃຈບໍລິສັດຮວາເຫວີຍທີ່ສ້າງຫ້ອງທົດລອງເປີດເຜີຍຢູ່ໄທ ເຊິ່ງຈະມີຜົນດີໃນການຊ່ວຍພັດທະນາເສດຖະກິດດີຈີຕອນ, ລັດຖະບານ, ວິສາຫະກິດ, ໂຮງຮຽນຊັ້ນສູງ ແລະອົງການຄົ້ນຄວ້າວິທະຍາສາດຂອງປະເທດຕົນກໍຈະໄດ້ຮັບຜົນປະໂຫຍດຫຼາຍທີ່ສຸດ.
ເຈົ້າໜ້າທີ່ບໍລິສັດຮວາເຫວີຍເປີດເຜີຍວ່າ, ບໍລິສັດຕົນໄດ້ລົງທຶນ 15 ລ້ານໂດລາກໍ່ສ້າງຫ້ອງທົດລອງດັ່ງກ່າວແລະກໍກວມເອົາເນື້ອທີ 2000 ແມັດຕາ, ເປົ້າໝາຍສຳຄັນກໍຄືການອຳນວຍຄວາມສະດວກໃຫ້ແກ່ລູກຄ້າ ແລະນັກວິຊາການປະດິດສ້າງດ້ານຂໍ້ມູນຂ່າວສານແລະເຕັກນິກໂທລະຄົມ ໃນພາກພື້ນອາຊີຕາເວັນອອກສຽງໃຕ້.
 |
