ຕາມຂ່າວCRI: ວັນທີ 1 ມິຖຸນານີ້, ທ່ານໂດນັນ ທຣຳ ປະທານາທິບໍດີອາເມລິກາໄດ້ປະກາດຢ່າງເປັນທາງການວ່າ, ໄດ້ຖອນອອກຈາກ "ສັນຍາປາຣີ" ແລ້ວຫຼັງເຫັນວ່າ, "ສັນຍາປາຣີ" ເຮັດໃຫ້ປະເທດຕົນປະສົບຄວາມເສຍຫາຍ GDP ເຖິງ 3 ພັນຕື້ໂດລາ ແລະເຮັດໃຫ້ປະຊາຊົນ 6 ລ້ານ 5 ແສນຄົນເສຍໂອກາດເຮັດວຽກ, ທີ່ສຳຄັນ ການຖອນອອກຈາກ "ສັນຍາປາຣີ" ຖືວ່າເປັນການຮັກສາອະທິປະໄຕຂອງອາເມລິກາອີກຄັ້ງໜຶ່ງ.
ການຕົກລົງຂອງທ່ານທຣຳ ຄືດັ່ງກ່ວໄດ້ຮັບການສະໜັບສະໜູນຈາກສະມາຊິກສະພາສັງກັດພັກລີພັບລີກັນເປັນສ່ວນຫຼາຍ, ແຕ່ກໍຖືກຫຼາຍຄົນກ່າວຕຳໜິ, ຂະນະທີ່ຫຼາຍວິສາຫະກິດໃຫຍ່ແລະອຳນາດການປົກຄອງທ້ອງຖິ່ນຕ່າງກໍຢືນຢັນຈະສະໜັບສະໜູນແລະປະຕິບັດຕາມ "ສັນຍາປາຣີ" ເໝືອນເດີມ.
ທ່ານບາຣັກ ໂອບາມາ ອະດີດປະທານາທິບໍດີອາເມລິກາກໍກ່າວວ່າ, ເຖິງຈະບໍ່ມີການນຳພາຂອງລັດຖະບານ, ປະຊາຊົນກໍຈະເລືອກອະນາຄົດທີ່ມີການລະບາຍມົນລະພິດຕ່ຳ ແລະເຖິງວ່າອາເມລິກາໄດ້ຖອນອອກຈາກ "ສັນຍາປາຣີ", ແຕ່ຕົນເຊື່ອວ່າ, ລັດ, ຕົວເມືອງແລະວິສາຫະກິດຕ່າງໆໃນປະເທດຈະພະຍາຍາມປົກປ້ອງອະນາຄົດຂອງໂລກໃຫ້ຫຼາຍກວ່າເກົ່າ.