ວັນທີ 2 ມິຖຸນານີ້, ທ່ານ ລິກສ໌ ຕີວເລີຊອນ ລັດຖະມົນຕີກະຊວງການຕ່າງປະເທດອາເມລິກາກ່າວວ່າ: ທ່ານເຫັນວ່າໃນອະນາຄົດ ອາເມລິກາຈະບໍ່ມີການປ່ຽນແປງໃດໆໃນການທຳຄວາມພະຍາຍາມຂອງຕົນເພື່ອຫຼຸດການລະບາຍກາກບອນດີອອກຊິດໃນປັດຈຸບັນ, ຫວັງວ່າຄົນທັງຫຼາຍຈະເບິ່ງບັນຫາດັ່ງກ່າວໄປທາງບວກ.
ວັນທີ 1 ມິຖຸນານີ້, ທ່ານ ໂດນັນ ທຣຳ ປະທານາທິບໍດີອາເມລິກາໄດ້ປະກາດຢູ່ສວນກຸຫຼາບຂອງທຳນຽບຂາວວ່າ: ອາເມລິກາຈະຖອນອອກຈາກສັນຍາປາຣີກ່ຽວກັບການຮັບມືກັບການປ່ຽນແປງຂອງດິນຟ້າອາກາດ. ທ່ານ ລິກສ໌ ຕີວເລີຊອນທີ່ເປັນຜູ້ສະໜັບສະໜູນອາເມລິກາສືບຕໍ່ຢູ່ໃນສັນຍາປາຣີນັ້ນບໍ່ໄດ້ເຂົ້າຮ່ວມການຖະແຫຼງຂ່າວດັ່ງກ່າວ.