ຕາມຂ່າວສານຈີນ:ຫຼັງລອນດອນເກີດເຫດໂຈມຕີກໍ່ການຮ້າຍອີກ,ສອງພັກການເມືອງໃຫຍ່ຂອງອັງກິດໄດ້ປະກາດຢຸດການຫາສຽງກ່ອນການເລືອກຕັ້ງເພື່ອສຸມກຳລັງເຂົ້າໃນແຜນການ ຕ້ານການກໍ່ການຮ້າຍ. ແນວໃດກໍດີ,ທ່ານນາງເຕເຣຊາ ເມ ນາຍົກລັດຖະມົນຕີອັງກິດກ່າວຢືນຢັນໃນວັນທີ 4 ມິຖຸນານີ້ວ່າ,ປະເທດຕົນຈະຈັດການເລືອກຕັ້ງຕາມແຜນການໃນວັນທີ 8 ເດືອນນີ້.
ທ່ານນາງເຕເຣຊາ ເມກ່າວໃນວັນດັ່ງກ່າວວ່າ,ພັກອະນຸລັກນິຍົມແລະພັກກຳມະກອນຈະຢຸດການຫາສຽງຊົ່ວຄາວເພື່ອສະແດງຄວາມເສຍໃຈຕໍ່ຜູ້ປະສົບເຄາະຮ້າຍໃນເຫດໂຈມຕີກໍ່ການຮ້າຍທັງເດັດດ່ຽວບໍ່ໃຫ້ເຫດການຮຸນແຮງທຳລາຍຂະບວນການປະຊາທິປະໄຕ,ຈາກນີ້,ການຫາສຽງຂອງພັກການເມືອງຕ່າງໆຈະຈັດຂຶ້ນໃໝ່ອີກໃນວັນຈັນນີ້ແລະການເລືອກຕັ້ງກໍຈະຈັດຂຶ້ນໃນວັນພະຫັດຕາມແຜນການ.
ຕອນທ່ຽງຄືນວັນທີ 3 ມິຖຸນານີ້ຕາມເວລາທ້ອງຖິ່ນ,ໃຈກາງເມືອງລອນດອນໄດ້ເກີດເຫດໂຈມຕີກໍ່ການຮ້າຍສົ່ງຜົນເຮັດໃຫ້ 7 ຄົນເສຍຊີວິດແລະ 48 ຄົນບາດເຈັບ. ຂະນະທີ່ 3 ເດືອນຜ່ານມາ,ອັງກິດໄດ້ເກີດເຫດໂຈມຕີກໍ່ການຮ້າຍມາແລ້ວ 3 ເທື່ອ.