ເພື່ອຊຸກຍູ້ການແລກປ່ຽນບົດຮຽນແລະຮ່ວມມືລະຫວ່າງສື່ຈີນກັບປະເທດຕ່າງໆໃນພາກພື້ນອາຊີປາຊິກຟິກແລະປະເທດລຽບຕາມໜຶ່ງແລວທາງໜຶ່ງເສັ້ນທາງແລະສົ່ງເສີມຈິດໃຈໜຶ່ງແລວທາງໜຶ່ງເສັ້ນທາງຄື "ສັນຕິພາບຮ່ວມມືກັນ,ເປີດປະຕູແລະເປີດກວ້າງ,ຖອດຖອນບົດຮຽນເຊິ່ງກັນແລະກັນ,ຕ່າງຝ່າຍຕ່າງໄດ້ຮັບຜົນປະໂຫຍດ", ອົງການພັດທະນາວິທະຍຸອາຊີປາຊິກຟິກຫຼື AIBD ,ອົງການຖະແຫຼງຂ່າວ,ການພິມຈຳໜ່າຍ,ວິທະຍຸ,ໂທລະພາບແລະຮູບເງົາແຫ່ງລັດຈີນແລະອົງການອຳນາດການປົກຄອງປະຊາຊົນເມືອງຊິງຕາວໄດ້ຮ່ວມກັນເປັນເຈົ້າພາບຈັດກອງປະຊຸມສຸດຍອດສື່ອາຊີ 2017 ຢູ່ເມືອງດັ່ງກ່າວໃນວັນທີ 6 ມິຖຸນານີ້.
ກອງປະຊຸມສຸດຍອດຄັ້ງນີ້ເນັ້ນຫົວຂໍ້ " ຍຸກສະໄໝໃໝ່ຂອງສື່,ທົ່ວໂລກຮ່ວມກັນພັດທະນາ "ໂດຍ ຜູ້ແທນກອງປະຊຸມໄດ້ຮ່ວມກັນຫາລືບັນຫາຕ່າງໆເປັນຕົ້ນສື່ຍຸກປັດຈຸບັນຈະຮັບມືກັບການທ້າທາຍແນວໃດ,ຮັບໃຊ້ເປົ້າໝາຍພັດທະນາທົ່ວໂລກໃຫ້ດີກວ່າເກົ່າແນວໃດແລະຊຸກຍູ້ການແລກປ່ຽນຖອດຖອນບົດຮຽນລະຫວ່າງອາລະຍະທຳທີ່ຕ່າງກັນ. ໃນໂອກາດດັ່ງກ່າວກໍຈະວາງສະແດງສື່ "ກອງປະຊຸມສຸດຍອດສື່ອາຊີ 2017"ເພື່ອຊຸກຍູ້ອົງການສື່ຈີນແລະຕ່າງປະເທດແລກປ່ຽນບົດຮຽນແລະຮ່ວມມືຖ່າຍທຳລາຍການຮູບເງົາໂທລະພາບ, ການຜະລິດອຸປະກອນເຕັກໂນໂລຊີແລະອື່ນໆໃຫ້ຫຼາຍຂຶ້ນ.
 |
