ຕາມຂ່າວສານຊິນຮວາ: ທ່ານຮຸນແຊນ ນາຍົກລັດຖະມົນຕີກຳປູເຈຍກ່າວວ່າ,ຜູ້ສະໝັກຮັບເລືອກຕັ້ງຈາກພັກປະຊາຊົນເຊິ່ງເປັນພັກກຳອຳນາດເປັນຜູ້ຊະນະການເລືອກຕັ້ງຂັ້ນຕາແສງຄັ້ງທີ 4 ຂອງປະເທດຕົນ.ວັນທີ 5 ເດືອນນີ້,ທ່ານຮຸນແຊນກ່າວໃນເຟສສ່ວນຕົວຂອງຕົນວ່າ,ຕາມໂຕເລກບໍ່ເປັນທາງການ,ໃນຈຳນວນບັດເລືອກຕັ້ງ 6 ລ້ານ 7 ແສນ 4 ໝື່ນກວ່າໃບນັ້ນ,ຜູ້ສະໝັກຈາກພັກປະຊາຊົນໄດ້ຄະແນນສຽງຫຼາຍກວ່າ 51%. ຂະນະທີ່ທ່ານຢິມໂສວັນ ໂຄສົກພັກກູ້ຊາດເຊິ່ງເປັນພັກຝ່າຍຄ້ານໃຫຍ່ກວ່າໝູ່ຂອງກຳປູເຈຍໄດ້ອອກມາຍອມຮັບຕໍ່ການເສຍໄຊໃນການເລືອກຕັ້ງຂັ້ນຕາແສງໃນຕອນຄ່ຳວັນທີ 4 ມິຖຸນານີ້.
ຄະນະກຳມະການເລືອກຕັ້ງລະດັບຊາດກຳປູເຈຍໄດ້ປະກາດຜົນການນັບຄະແນນສຽງເບື້ອງຕົ້ນໃນຕອນຄ່ຳວັນທີ 5 ເດືອນີ້ແລະຈະປະກາດຢ່າງເປັນທາງການໃນວັນທີ 25 ເດືອນດຽວກັນ.
ການເລືອກຕັ້ງຂັ້ນຕາແສງຢູ່ກຳປູເຈຍຈັດຂຶ້ນ 5 ປີຕໍ່ເທື່ອແລະການເລືອກຕັ້ງຄັ້ງນີ້ມີຜູ້ສະໝັກຈາກ 12 ພັກການເມືອງເຂົ້າຮ່ວມເຊິ່ງຖືເປັນຂີດໝາຍທາງການເມືອງຂອງການເລືອກຕັ້ງທົ່ວໄປໃນປີ 2018 ແລະເປັນສິ່ງທີ່ໜ້າສົນໃຈທີ່ສຸດ.
 |
