ຕາມຂ່າວສານຊິນຮວາ: ກະຊວງການຕ່າງປະເທດກາຕາຖະແຫຼງໃນວັນທີ 5 ມິຖຸນານີ້ ໂດຍໄດ້ສະແດງຄວາມເສຍດາຍແລະຕົກໃຈຫຼັງອາຣັບບີຊາອຸດິດ, ສະຫະນະຄອນເອເມຣັດອາຣັບ ແລະບາເຣນທີ່ຕັດສາຍພົວພັນການທູດກັບປະເທດຕົນ.
ຖະແຫຼງການລະບຸວ່າ, ກາຕາແມ່ນປະເທດສະມາຊິກຄະນະກຳມະການຮ່ວມມືປະເທດອາຣັບອ່າວເປີເຊຍ ເຊິ່ງຜ່ານມາໄດ້ປະຕິບັດຕາມກົດບັດ, ເຄົາລົບແລະບໍ່ເຄີຍແຊກແຊງວຽກງານພາຍໃນຂອງປະເທດອື່ນຈັກເທື່ອ ທັງໄດ້ປະຕິບັດພັນທະຕໍ່ການຄັດຄ້ານລັດທິກໍ່ການຮ້າຍແລະຄວາມຮຸນແຮງ. ແນວໃດກໍດີ, ປະເທດຕ່າງໆ ເຊັ່ນອາຣັບບີຊາອຸດິດເປັນຕົ້ນໄດ້ປິດຊາຍແດນແລະຕັດຂາດການໄປມາຫາສູ່ກັນທາງທະເລແລະທາງອາກາດກັບປະເທດຕົນນັ້ນ ຖືວ່າບໍ່ມີເຫດຜົນແຕ່ຢ່າງໃດ.
ທັງນີ້ ໃນວັນທີ 5 ມິຖຸນານີ້, ບາເຣນ, ອາຣັບບີຊາອຸດິດ, ສະຫະນະຄອນເອເມຣັດອາຣັບ ແລະເອຢິບ ໄດ້ຕຳໜິກາຕາທີ່ໄດ້ສະໜັບສະໜູນລັດທິກໍ່ການຮ້າຍ ແລະທຳລາຍສະຖານະການຄວາມໝັ້ນຄົງຂອງພາກພື້ນ ຈຶ່ງປະກາດຕັດສາຍພົວພັນການທູດກັບປະເທດດັ່ງກ່າວ.
ໃນຫຼາຍປີມໍ່ໆມານີ້, ກາຕາໄດ້ສະໜັບສະໜູນກຸ່ມພະລາດດອນພາບມຸສລິມ, ອົງການຮາມັສ ແລະກຸ່ມອື່ນໆຢູ່ພາກພື້ນຕາເວັນອອກກາງ ເຊິ່ງເຮັດໃຫ້ຫຼາຍປະເທດອາຣັບບໍ່ພໍໃຈເປັນທີ່ສຸດ ໂດຍນັກວິເຄາະເຫັນວ່າ, ກາຕາມີສາຍພົວພັນຢ່າງໃກ້ຊິດກັບອີຣານທີ່ເປັນສັດຕູເກົ່າຂອງປະເທດນິກາຍສຸນີເຊັ່ນ ອາຣັບບີຊາອຸດິດເປັນຕົ້ນນັ້ນ ແມ່ນເຫດຜົນໂດຍກົງທີ່ເຮັດໃຫ້ຫຼາຍປະເທດຕາເວັນອອກກາງຕັດສາຍພົວພັນການທູດກັບກາຕາ.
 |
