ໃນການຖະແຫຼງການທີ່ຈັດຂຶ້ນຢູ່ນະຄອນຫຼວງປັກກິ່ງເມື່ອວັນທີ 5 ມິຖຸນານີ້, ມີນັກຂ່າວຖາມວ່າ: ຕາມຂ່າວແຈ້ງວ່າ, ລັດຖະມົນຕີການຕ່າງປະເທດອາເມລິກາກ່າວໃນຕົ້ນເດືອນນີ້ວ່າ, ບໍ່ຄວນອະນຸຍາດໃຫ້ຈີນນຳໃຊ້ກຳລັງເສດຖະກິດເປັນສາກບັງໜ້າເພື່ອເນັ້ນໜ້າທີ່ຮັບຜິດຊອບໃນບັນຫາທະເລຈີນໃຕ້, ສປປ ເກົາຫຼີ ແລະອື່ນໆ. ຂໍຖາມແດ່, ຈີນຄຶດເຫັນແນວໃດ?
ທ່ານນາງ ຮວ້າຊຸ່ນຢິງ ໂຄສົກກະຊວງການຕ່າງປະເທດຈີນຕອບວ່າ, ຈາກຄວາມພະຍາຍາມຮ່ວມຂອງປະເທດໃນພາກພື້ນນີ້ ໄດ້ເຮັດໃຫ້ປັດຈຸບັນ, ບັນຫາທະເລຈີນໃຕ້ໄດ້ກັບຄືນສູ່ເສັ້ນທາງແກ້ໄຂໂດຍຜ່ານການເຈລະຈາລະຫວ່າງປະເທດທີ່ກ່ຽວຂ້ອງໂດຍກົງ ເຊິ່ງຈີນແລະຟິລິບປິນກໍໄດ້ມີຄວາມເອກະພາບກັນກ່ຽວກັບການແກ້ໄຂບັນຫາດັ່ງກ່າວຢ່າງເໝາະສົມແລ້ວ. ຂະນະດຽວກັນ, ຈີນແລະປະເທດໃນອາຊຽນ ຍັງໄດ້ຕົກລົງຂອບຂອງກົດແຫ່ງການປະພຶດຢູ່ທະເລຈີນໃຕ້ ໂດຍໄດ້ສ້າງພື້ນຖານອັນໜັກແໜ້ນໃຫ້ແກ່ການເຈລະຈາກົດດັ່ງກ່າວຕໍ່ໄປ. ຖືວ່າ ຄວາມພະຍາຍາມຂອງຈີນແລະປະເທດໃນອາຊຽນໃນການຮ່ວມກັນປົກປັກຮັກສາສັນຕິພາບແລະສະຖຽນລະພາບຂອງທະເລຈີນໃຕ້ນັ້ນ ທຸກໆຄົນຕ່າງກໍເຫັນໄດ້ຢ່າງຈະແຈ້ງແລ້ວ. ຈາກນີ້ຈຶ່ງຫວັງວ່າຝ່າຍທີ່ກ່ຽວຂ້ອງຈົ່ງເຄົາລົບແລະສະໜັບສະໜູນຄວາມພະຍາຍາມຂອງປະເທດໃນພາກພື້ນນີ້ຢ່າງເຕັມສ່ວນ ແລະເສີມຂະຫຍາຍບົດບາດສ້າງສັນເພື່ອເລື່ອງນີ້.