ຊຸດອົບຮົມການຄ້າເອເລັກໂຕຣນິກຂ້າມຊາດຈີນ-ອາຊຽນປີ 2017 ທີ່ກອງເລຂາງານວາງສະແດງສິນຄ້າຈີນ-ອາຊຽນເປັນເຈົ້າພາບຈັດຂຶ້ນເປັນຄັ້ງທຳອິດໄດ້ໄຂຂຶ້ນຢູ່ເມືອງນານນິງເຂດປົກຄອງຕົນເອງເຜົ່າຈວ້າງກວາງຊີຈີນໃນວັນທີ 6 ມິຖຸນານີ້ ໂດຍເຈົ້າໜ້າທີ່ກວ່າ 30 ທ່ານຈາກອາຊຽນເຊັ່ນ:ຫວຽດນາມ,ກຳປູເຈຍ,ລາວ,ມຽນມາແລະອື່ນໆໄດ້ແລກປ່ຽນແລະຖອດຖອນບົດຮຽນການພັດທະນາຂະແໜງການຄ້າເອເລັກໂຕຣນິກຂ້າມຊາດ.
ເຈົ້າໜ້າທີ່ບັນດາປະເທດໃນອາຊຽນໄດ້ແຈ້ງສະພາບການພັດທະນາຂະແໜງການ ຄ້າເອເລັກໂຕຣນິກຂອງປະເທດຕົນ ພ້ອມທັງກ່າວດ້ວຍຄວາມຫວັງທີ່ຈະຮ່ວມມືສ້າງເວທີການຄ້າເອເລັກໂຕຣນິກຂ້າມຊາດກັບຈີນ ເພື່ອແກ້ໄຂຄວາມຫຍຸ້ງຍາກໃນການພັດທະນາຂະແໜງການດັ່ງກ່າວຂອງແຕ່ລະປະເທດ.
ທ່ານ ຫວາງເລີຍ ເລຂາທິການໃຫຍ່ກອງເລຂາງານວາງສະແດງສິນຄ້າຈີນ-ອາຊຽນກ່າວວ່າ: ງານວາງສະແດງສິນຄ້າຈີນ-ອາຊຽນຈະຕັ້ງໜ້າສ້າງເວທີການຄ້າເອເລັກໂຕຣນິກຂ້າມຊາດຢູ່ໃນພາກພື້ນ ທັງຈະຊ່ວຍບັນດາປະເທດໃນພາກພື້ນຮ່ວມມືກັນໃນຫຼາຍດ້ານເຊັ່ນ: ການແລກປ່ຽນລະຫວ່າງວິສາຫະກິດ,ການຄ້າສິນຄ້າທີ່ມີເອກະລັກພິເສດ,ຊຸກຍູ້ການເຈລະຈາລະຫວ່າງພາກລັດກັບພາກເອກະຊົນ,ແລກປ່ຽນແລະຖອດຖອນບົດຮຽນແລະການປະສານງານດ້ານນະໂຍບາຍເປັນຕົ້ນ.