ສປປ ເກົາຫຼີກ່າວວ່າ, ລັດຖະບານ ສ ເກົາຫຼີຕ້ອງເຄົາລົບນັບຖືແລະປະຕິບັດຕາມຖະແຫຼງການຮ່ວມທີ່ສຳຄັນສອງສະບັບເປັນພື້ນຖານເພື່ອປັບປຸງສາຍພົວພັນລະຫວ່າງເໜືອໃຕ້.
ໜັງສືພິມໂຣດົງຊິນບູນຂອງ ສປປ ເກົາຫຼີສະບັບວັນທີ 6 ມິຖຸນານີ້ໄດ້ພິມບົດຄວາມພາດຫົວວ່າ, ພື້ນຖານໃນການແກ້ໄຂວິກິດການການພົວພັນເໜືອໃຕ້ຄືການເຄົາລົບນັບຖືແລະປະຕິບັດຕາມ "ຖະແຫຼງການຮ່ວມເໜືອໃຕ້" ແລະ "ຖະແຫຼງການເສີມຂະຫຍາຍສາຍພົວພັນລະຫວ່າງເໜືອໃຕ້ແລະສັນຕິພາບທີ່ຖາວອນ". ບົດຄວາມລະບຸວ່າ, ສອງຝ່າຍເໜືອໃຕ້ໄດ້ອອກຖະແຫຼງການຮ່ວມໃນການພົບປະກັນລະຫວ່າງປະມຸກລັດສອງຄັ້ງ, ເຊິ່ງໄດ້ກາຍເປັນເອກະສານ "ເຕົ້າໂຮມຄວາມເປັນເອກະພາບກັນດ້ວຍຄວາມເປັນເຈົ້າຕົນເອງ". ການປ່ຽນແປງອຳນາດການປົກຄອງຂອງ ສ ເກົາຫຼີບໍ່ໝາຍຄວາມວ່າສາຍພົວພັນລະຫວ່າງເໜືອໃຕ້ຈະໄດ້ຮັບການປັບປຸງດີຂຶ້ນ, ແຕ່ສິ່ງສຳຄັນຄືບໍ່ແມ່ນໃຜໄດ້ຄອງອຳນາດ, ຫາກແຕ່ແມ່ນຜູ້ຄອງອຳນາດເຄົາລົບນັບຖືແລະປະຕິບັດຕາມຖະແຫຼງການສອງສະບັບດັ່ງກາວຫຼືບໍ່?
ບົດຄວາມຍັງຊີ້ໃຫ້ເຫັນອີກວ່າ, ການເປີດກວ້າງການຮ່ວມມືແລະການໄປມາຫາສູ່ກັນລະຫວ່າງອົງການຈັດຕັ້ງສັງຄົມລະຫວ່າງເໜືອໃຕ້ຄືນໃໝ່ແມ່ນຄວາມຈຳເປັນ, ແຕ່ບໍ່ໝາຍຄວາມວ່າການພົວພັນລະຫວ່າງສອງຝ່າຍຈະໄດ້ປັບປຸງດີຂຶ້ນແລ້ວ.