ຕາມຂ່າວສານຈີນ: ກອງປະຊຸມເພື່ອການປົກປັກຮັກສາແລະເຜີຍແຜ່ມໍລະດົກວັດທະນະທຳປະເທດຕາມແມ່ນ້ຳລ້ານຊ້າງ-ແມ່ນ້ຳຂອງໄດ້ໄຂຂຶ້ນຢູ່ເມືອງຄຸນມິງແຂວງຢຸນນານ ສປ ຈີນໃນວັນທີ 6 ມິຖຸນານີ້ ແລະຈະດຳເນີນເປັນເວລາສອງວັນ ໂດຍເຈົ້າໜ້າທີ່ລັດຖະບານແລະຊ່ຽວຊານຈາກຈີນ, ລາວ, ກຳປູເຈຍ, ມຽນມາ, ໄທ ແລະຫວຽດນາມໄດ້ລົງເລິກຄົ້ນຄວ້າປຶກສາຫາລືໃນຫົວຂໍ້ຜົນສຳເລັດໃນການປົກປັກຮັກສາມໍລະດົກວັດທະນະທຳ, ການພັດທະນາການນຳໃຊ້ມໍລະດົກວັດທະນະທຳ ແລະການແລກປ່ຽນຮ່ວມມືໃນການປົກປັກຮັກສາມໍລະດົກວັດທະນະທຳ.
ທ່ານທອງໃບ ໂພທິສານ ຫົວໜ້າກົມມໍລະດົກແຫ່ງຊາດກະຊວງຖະແຫຼງຂ່າວ ວັດທະນະທຳແລະທ່ອງທ່ຽວລາວກ່າວວ່າ, 6 ປະເທດຕາມແມ່ນ້ຳລ້ານຊ້າງ-ແມ່ນ້ຳຂອງມີວັດທະນະທຳທີ່ອຸດົມສົມບູນແລະມີເອກະລັກພິເສດຂອງຕົນ ເຊິ່ງການເພີ່ມທະວີການຮ່ວມມືໃນການປົກປັກຮັກສາມໍລະດົກວັດທະນະທຳຂອງບັນດາປະເທດຈິ່ງມີຄວາມໝາຍສຳຄັນທີ່ສຸດ ແລະຫວັງວ່າກອງປະຊຸມເທື່ອນີ້ ຈະສາມາດສ້າງກົນໄກການຮ່ວມມືທີ່ດີ ແລະຊຸກຍູ້ການປົກປັກຮັກສາມໍລະດົກວັດທະນະທຳໃນພາກພື້ນນີ້.