ກ່ອນໜ້ານີ້ບໍ່ດົນ, ຫຼາຍສຳນັກສື່ມວນຊົນຕາເວັນຕົກລາຍງານຂ່າວວ່າ, ສະມາຊິກສັນຊາດຈີນສາມຄົນຂອງອົງການທີ່ບໍ່ຫວັງຜົນກຳໄລທີ່ມີສຳນັກງານໃຫຍ່ຕັ້ງຢູ່ອາເມລິການັ້ນ ໄດ້ຖືກຈັບ ແລະຫາຍສາບສູນຢູ່ຈີນ.
ອົງການຕຳຫຼວດເມືອງກ້ານໂຈ່ວແຂວງຈ່ຽງຊີ່ຈີນ ແຈ້ງວ່າ, ຫວ່າງມໍ່ໆມານີ້, ໂດຍອີງຕາມການແຈ້ງບອກຂອງປະຊາຊົນ, ອົງການຂອງຕົນໄດ້ມ້າງຄະດີນຳໃຊ້ເຄື່ອງດັກລັກຟັງແລະລັກຖ່າຍຮູບຢ່າງຜິດກົດໝາຍ ໂດຍສາມາດຈັບກຸມຜູ້ຕ້ອງຫາສາມຄົນຄື: ຊູ່ເຮີງ, ຫຼີຈ່າວ ແລະຮວ້າໄຫເຟິ່ງ.
ຂ່າວແຈ້ງວ່າ, ວັນທີ 24 ພຶດສະພາຜ່ານມາ, ຕຳຫຼວດເມືອງກ້ານໂຈ່ວແຂວງຈ່ຽງຊີ່ ໄດ້ຮັບການແຈ້ງບອກຈາກໂຮງງານແຫ່ງໜຶ່ງຂອງເມືອງຕົນວ່າ, ຫວ່າງມໍ່ໆນີ້, ໄດ້ປາກົດເຫັນກຳມະກອນຜູ້ໜຶ່ງມັກລັກຖ່າຍຮູບຈຸດເຮັດວຽກຕ່າງໆຂອງພາຍໃນໂຮງງານເລື້ອຍໆໃນໄລຍະເຮັດວຽກ, ຈາກນັ້ນຈຶ່ງສົງໄສວ່າ ຄວາມລັບທາງການຄ້າຂອງໂຮງງານຕົນອາດຈະຖືກລັກ. ມາໃນວັນທີ 27-28 ເດືອນດຽວກັນ, ຕຳຫຼວດທ້ອງຖິ່ນໄດ້ພົບ ຊູ່ເຮີງ ກຳມະກອນຂອງໂຮງງານດັ່ງກ່າວ ພ້ອມດ້ວຍຜູ້ສົມຮູ້ຮ່ວມຄິດສອງຄົນຄື ຫຼີຈ່າວ ແລະ ຮວ້າໄຫເຟິ່ງ ຢູ່ໂຮງແຮມແຫ່ງໜຶ່ງຂອງເມືອງກ້ານໂຈ່ວ, ທັງໄດ້ຄົ້ນພົບແລະຍຶດເຄື່ອງດັກລັກຟັງແລະລັກຖ່າຍຮູບ ພ້ອມດ້ວຍຮູບ, ສຽງ ແລະພາບວິດີໂອກ່ຽວກັບໂຮງງານດັ່ງກ່າວຢ່າງຫຼວງຫຼາຍໃນຖົງເຄື່ອງຂອງສາມຄົນດັ່ງກ່າວ.
ຫຼັງເຈົ້າໜ້າທີ່ຕຳຫຼວດສືບສວນເພີ່ມຕື່ມ ແລະການຮັບສາລະພາບຂອງຜູ້ຕ້ອງຫາທີ່ຖືກຜູ້ອື່ນບົ່ງການ, ຊູ່ເຮີງ, ຫຼີຈ່າວ ແລະຮວ້າໄຫເຟິ່ງ ໄດ້ວາງແຜນເຂົ້າໂຮງງານດັ່ງກ່າວດ້ວຍຮູບການເປັນກຳມະກອນຮັບຈ້າງ ເພື່ອເກັບໂຮມເອກະສານລັບດ້ານການຄ້າຂອງໂຮງງານ ທັງສະໜອງໃຫ້ອົງການທີ່ກ່ຽວຂ້ອງຂອງຕ່າງປະເທດ. ທັງນີ້ ນັບແຕ່ປີ 2010 ເປັນຕົ້ນມາ ພວກເຂົາໄດ້ກໍ່ຄະດີຫຼາຍເທື່ອໃນທົ່ວປະເທດ ແລະໄດ້ສະໜອງໃຫ້ອົງການຕ່າງປະເທດນັບບໍ່ຖ້ວນ.
ປັດຈຸບັນ,ໂດຍປະຕິບັດຕາມມາດຕາ 284 ຂອງກົດໝາຍອາຍາຈີນ, ຕຳຫຼວດທ້ອງຖິ່ນໄດ້ກັກ ຊູ່ເຮີງ, ຫຼີຈ່າວ ແລະຮວ້າໄຫເຟິ່ງດ້ວຍຂໍ້ຫານຳໃຊ້ເຄື່ອງດັກລັກຟັງແລະລັກຖ່າຍຮູບຢ່າງຜິດກົດໝາຍ ແລະກຳລັງດຳເນີນຄະດີນີ້ຕື່ມອີກຕາມກົດໝາຍຂອງ ສປ ຈີນ.