ຕາມຂ່າວສານຈີນ: ເວທີປຶກສາຫາລືຜູ້ພິພາກສາໃຫຍ່ຈີນ-ອາຊຽນຄັ້ງທີ 2 ຈະຈັດຂຶ້ນຢູ່ເມືອງນານນິງເຂດກວາງຊີ ສປ ຈີນແຕ່ວັນທີ 7-9 ມິຖຸນານີ້ ໂດຍມີຜູ້ຮັບຜິດຊອບສານປະຊາຊົນສູງສຸດຂອງ 16 ປະເທດຄືມາເລເຊຍ, ຟິລິບປິນ, ສິງກະໂປ, ໄທ, ບຣູໄນ, ຫວຽດນາມ ແລະອິນເດຍເປັນຕົ້ນເຂົ້າຮ່ວມ.
ທ່ານ ຮວງເຄີ້ ຫົວໜ້າສານປະຊາຊົນຂັ້ນສູງເຂດວາງຊີຈີນ ກ່າວໃນວັນທີ 6 ມິຖຸນານີ້ວ່າ, ຄຽງຄູ່ກັບການພົວພັນດ້ານການຄ້າແລະບຸກຄະລາກອນລະຫວ່າງຈີນກັບອາຊຽນນັບມື້ນັບແໜ້ນແຟ້ນ, ການຮ່ວມມືດ້ານຕຸລາການລະຫວ່າງເຂດກວາງຊີກັບອາຊຽນ ກໍຫວັງຈະໃຫ້ເພີ່ມຂຶ້ນຢ່າງບໍ່ຢຸດຢັ້ງ, ການທີ່ສອງຝ່າຍຮ່ວມກັນຮັບມືກັບການທ້າທາຍຕ່າງໆ ເຊັ່ນການກະທຳຜິດຂ້າມພາກພື້ນເປັນຕົ້ນ, ການຊຸກຍູ້ການພົວພັນເສດຖະກິດການຄ້າແລະການລົງທຶນທີ່ກົມກຽວກັນແລະເປັນລະບຽບຮຽບຮ້ອຍທີ່ເປັນຮູບປະທຳ ແລະສະພາບການຮ່ວມມືດ້ານຕຸລາການທີ່ແທ້ຈິງແລະບັງເກີດຜົນນັ້ນ ແມ່ນໜ້າທີ່ທີ່ຮີບດ່ວນທີ່ສຸດ. ຈາກນີ້, ເຂດກວາງຊີໃຊ້ຮູບການຕ່າງໆ ເຊັ່ນການສ້າງສູນແລກປ່ຽນອົບຮົມຜູ້ພິພາກສາຈີນ-ປະເທດສະມາຊິກອາຊຽນ, ເວັບໄຊສູນຂໍ້ມູນຂ່າວສານກົດໝາຍແລະຕຸລາການຈີນ-ອາຊຽນ ແລະອື່ນໆ ເພື່ອສ້າງເວທີໃໝ່ແຫ່ງການຮ່ວມມືດ້ານຕຸລາການຈີນ-ອາຊຽນ ແລະສ້າງສະພາບແວດລ້ອມດ້ານກົດໝາຍການລົງທຶນທີ່ດີໃຫ້ແກ່ບັນດາປະເທດໃນການແລກປ່ຽນເສດຖະກິດການຄ້າ. ຂະນະດຽວກັນ, ຈະເພີ່ມທະວີການອົບຮົມຊັບພະຍາກອນມະນຸດດ້ານກົດໝາຍຕ່າງໆທີ່ມີຄຸນນະພາບສູງ ໂດຍຫັນໜ້າສູ່ອາຊຽນ ເພື່ອບໍລິການການພັດທະນາຂອງວິສາຫະກິດສອງຝ່າຍ.
 |
