ວັນທີ 8 ມິຖຸນານີ້, ທ່ານ ສີຈິ້ນຜິງ ປະທານປະເທດຈີນໄດ້ພົບປະເຈລະຈາກັບທ່ານ ນູຊູຕານ ນາຈາບາເອຟ ປະທານາທິບໍດີກາຊັກສະຖານຢູ່ນະຄອນຫຼວງອັສທານາປະເທດກາຊັກສະຖານ ໂດຍປະມຸກລັດຂອງສອງປະເທດໄດ້ຕີລາຄາຜົນສຳເລັດໃນການເສີມຂະຫຍາຍສາຍພົວພັນສອງຝ່າຍ ນັບແຕ່ໄດ້ສ້າງຕັ້ງສາຍພົວພັນທາງການທູດຕະຫຼອດໄລຍະ 25 ປີຜ່ານມາ ຂະນະດຽວກັນກໍໄດ້ກຳນົດທິດທາງແລະຂົງເຂດຈຸດສຸມການຮ່ວມມືໃນໄລຍະຕໍ່ໜ້າ ພ້ອມທັງໄດ້ຕົກລົງຈະຊຸກຍູ້ສາຍພົວພັນຄູ່ຮ່ວມຍຸດທະສາດຮອບດ້ານ ໃຫ້ພັດທະນາສູງຂຶ້ນກວ່າເກົ່າທັງປອດໃສແລະໝັ້ນທ່ຽງ ເພື່ອສ້າງຄວາມສົມບູນພູນສຸກໃຫ້ແກ່ປະຊາຊົນສອງປະເທດ.
ສອງຝ່າຍໄດ້ເຫັນດີຍຶດໝັ້ນຕໍ່ການພັດທະນາທິດທາງສາຍພົວພັນຄູ່ຮ່ວມຍຸດທະສາດຮອບດ້ານ ແລະເຫັນດີໃຫ້ເລັ່ງຊຸກຍູ້ການສ້າງ "ໜຶ່ງແລວທາງໜຶ່ງເສັ້ນທາງ" ໃຫ້ເຊື່ອມຕໍ່ກັບນະໂຍບາຍເສດຖະກິດໃໝ່ "ເສັ້ນທາງທີ່ສົດໃສ", ບັນລຸການເຊື່ອມໂຍງຍຸດທະສາດການພັດທະນາລະຫວ່າງສອງປະເທດເຂົ້າກັນຢ່າງໜັກແໜ້ນ. ນອກນີ້, ສອງຝ່າຍຍັງໄດ້ເຫັນດີເພີ່ມທະວີການຮ່ວມມືຄວາມສາມາດດ້ານການຜະລິດແລະການລົງທຶນ, ການແລກປ່ຽນດ້ານວັດທະນະທຳ ແລະ ຕັ້ງໜ້າຮ່ວມມືໃນລະດັບທ້ອງຖິ່ນ. ຈີນສະໜັບສະໜູນກາຊັກສະຖານຈັດງານວາງສະແດງສິນຄ້າໂລກອັສທານາໃຫ້ປະສົບຜົນສຳເລັດ. ສອງຝ່າຍໄດ້ເຫັນດີຈະຮັກສາການປະສານພົວພັນບັນຫາສາກົນແລະພາກພື້ນທີ່ສຳຄັນຢ່າງໃກ້ຊິດ.
ຫຼັງການພົບປະ, ປະມຸກລັດຂອງສອງປະເທດຍັງໄດ້ເຊັນ "ຖະແຫຼງການຮ່ວມສາທາລະນະລັດປະຊາຊົນຈີນແລະສາທາລະນະລັດກາຊັກສະຖານ" ແລະໄດ້ຮ່ວມກັນເປັນສັກຂີພິຍານຕໍ່ການເຊັນເອກະສານຮ່ວມມືຫຼາຍສະບັບແລະຖະແຫຼງຂ່າວຕໍ່ສື່ມວນຊົນ.