ທ່ານສີຈິ້ນຜີງໄດ້ວາງຂໍ້ສະເໜີ5ຂໍ້ກ່ຽວກັບການພັດທະນາອົງການຮ່ວມມືຊຽງໄຮ, ຄື: ໜຶ່ງ, ເພີ່ມຄວາມສາມັກຄີແລະປະສານສົມທົບກັນ, ຕ້ອງເພີ່ມທະວີຄວາມໄວ້ເນື້ອເຊື່ອໃຈກັນດ້ານການເມືອງ, ເພີ່ມທະວີຄວາມຊ່ວຍຊູຍູ້ໜູນກັນ, ເພີ່ມທະວີການການແລກປ່ຽນແລະການຮ່ວມມືໃນຂົງເຂດອົງການນິຕິບັນຍັດ,ພັກການເມືອງ,ແລະຕຸລາການເປັນຕົ້ນ, ສ້າງປະຊາຄົມຮ່ວມຊະຕາກຳທີ່ສະເໝີພາບກັນ,ຊ່ວຍເຫຼືອເຊິ່ງກັນແລະກັນ,ຮ່ວມສຸກຮ່ວມທຸກ,ຮ່ວມກັນປ້ອງກັນຄວາມໝັ້ນຄົງ. ສອງ, ຮ່ວມມືຮັບມືກັບສິ່ງທ້າທາຍ. ຈີນມີເຈດຕະນາ ເພີ່ມທະວີການກໍ່ສ້າງອົງການຕ້ານການກໍ່ການຮ້າຍໃນພາກພື້ນ, ລິເລີ່ມຈັດກອງປະຊຸມເວທີປຶກສາຫາລືວຽກງານປ້ອງກັນຄວາມໝັ້ນຄົງ, ກຳນົດໂຄງຮ່າງວ່າດ້ວຍການຮ່ວມມືຕໍ່ຕ້ານ "ອິດທີກຳລັງກໍ່ການຮ້າຍ,ອິດທິກຳລັງແບ່ງແຍກແລະອິດທິກຳລັງຫົວຮຸນແຮງ" ໃນ3ປີຂ້າງໜ້ານີ້. ສາມ, ລົງເລິກການຮ່ວມມືທີ່ຕິດແທດຕົວຈິງ. ຈີນແລະຝ່າຍຕ່າງໆທີ່ກ່ຽວຂ້ອງພວມຕັ້ງໜ້າຊຸກຍູ້ການສ້າງ "ໜຶ່ງແລວທາງໜຶ່ງເສັ້ນທາງ" ເຊື່ອມຈອດກັບຍຸດທະສາດພັດທະນາຂອງປະເທດຕ່າງໆ,ອົງການຮ່ວມມືຊຽງໄຮສາມາດເສີມຂະຫຍາຍບົດບາດອັນສຳຄັນເພື່ອເລື່ອງນີ້. ສີ່, ຮັດແໜ້ນສາຍພົວພັນທາງດ້ານວັດທະນະທຳ. ຫ້າ, ຍຶດໝັ້ນການເປີດປະຕູແບບໂອບອ້ອມອາລີ. ຈີນສະໜັບສະໜູນອົງການຮ່ວມມືຊຽງໄຮຮ່ວມມືກັບປະເທດສັງເກດການ, ຄູ່ເຈລະຈາແລະປະເທດອື່ນໆ, ແລະເຫັນດີໃຫ້ອົງການຮ່ວມມືຊຽງໄຮສືບຕໍ່ເປີດກວ້າງການແລກປ່ຽນກັບອົງການສະຫະປະຊາຊາດແລະອົງການຈັດຕັ້ງສາກົນແລະພາກພື້ນອື່ນໆ.
ຜູ້ນຳປະເທດຕ່າງໆທີ່ຮ່ວມປະຊຸມເຫັນດີເປັນເອກະພາບກັນວ່າ, ການເພີ່ມສະມາຊິກຂອງອົງການຮ່ວມມືຊຽງໄຮຈະຊຸກຍູ້ການພັດທະນາ, ແລະເພີ່ມຄວາມສາມາດບົ່ມຊ້ອນຂອງຕົນ. ໂດຍຢູ່ບົນພື້ນຖານຫຼັກການເຄົາລົບກັນ,ຮ່ວມມືແບບຕ່າງຝ່າຍຕ່າງມີຜົນປະໂຫຍດ,ບໍ່ປະທະກັນ, ບໍ່ເປັນປໍລະປັກກັນ, ປະຕິບັດຕາມກົດໝາຍສາກົນ, ສະເໝີພາບກັນແລະຄວາມໝັ້ນຄົງທີ່ຕັດແຍກຈາກກັນບໍ່ໄດ້, ພິຈາລະນາເຖິງຜົນປະໂຫຍດເຊິ່ງກັນແລະກັນແລະຫຼັກການອື່ນໆ, ສ້າງໂລກທີ່ມີຫຼາຍຂົ້ວທີ່ທ່ຽງທຳແລະສົມເຫດສົມຜົນກວ່າເກົ່າ, ສອດຄ່ອງກັບຜົນປະໂຫຍດຮ່ວມແລະຜົນປະໂຫຍດປະເທດໃຜລາວ, ຊຸກຍູ້ການສ້າງປະຊາຄົມຮ່ວມຊະຕາກຳຂອງມວນມະນຸດ.
ປະມຸກລັດປະເທດສະມຊິກຂອງອົງການຮ່ວມມືຊຽງໄຮຍັງໄດ້ລົງນາມໃນເອກະສານຕ່າງໆ, ເຊັ່ນ: "ຖະແຫຼງການອັສທານາຂອງປະມຸກລັດປະເທດສະມາຊິກອົງການຮ່ວມມືຊຽງໄຮ", "ສົນທິສັນຍາຕໍ່ຕ້ານລັດທິຫົວຮຸນແຮງຂອງອົງການຮ່ວມມືຊຽງໄຮ"ແລະອື່ນໆ. ກອງປະຊຸມຍັງໄດ້ເຜີຍແຜ່ "ຖະແຫຼງການຂອງປະມຸກລັດປະເທດສະມາຊິກອົງການຮ່ວມມືຊຽງໄຮກ່ຽວກັບການຮ່ວມກັນຕໍ່ຕ້ານລັດທິກໍ່ການຮ້າຍສາກົນ" ແລະ "ຖະແຫຼງຂ່າວກອງປະຊຸມສະພາມົນຕີປະມຸກລັດປະເທດສະມາຊິກອົງການຮ່ວມມືຊຽງໄຮ".
