ເຈົ້າໜ້າທີ່ກອງທັບຟີລິບປິນກ່າວໃນວັນທີ 10 ມິຖຸນານີ້ວ່າ: ທະຫານທະເລສູ້ຮົບເທິງບົກຂອງປະເທດຕົນ 13 ຄົນໄດ້ເສຍຊີວິດໃນການກວາດລ້າງຜູ້ປະກອບອາວຸດກຸ່ມເມົາເຕແລະກຸ່ມຫົວຮຸນແຮງອື່ນໆຢູ່ເມືອງມາລາວີໃນວັນທີ 9 ມິຖຸນານີ້ ແລະມີປະຊາຊົນອີກ 40 ກວ່າຄົນບາດເຈັບ. ມາຮອດປັດຈຸບັນ, ທະຫານແລະຕຳຫຼວດຟີລິບປິນໄດ້ເສຍຊີວິດໃນການສູ້ຮົບຢູ່ມາລາວີໄດ້ເພີ່ມຂຶ້ນເປັນ 58 ຄົນ.
ທ່ານ ໂຈອາ ເຮີຣີຣາ ໂຄສົກກອງທັບຟີລິບປິນກ່າວວ່າ: ການສູ້ຮົບໃນມື້ດຽວກັນ, ກອງທັບລັດຖະບານຟີລິບປິນໄດ້ໂຈມຕີຜູ້ປະກອບອາວຸດຢ່າງໜັກໜ່ວງ ເຮັດໃຫ້ຜູ້ປະກອບອາວຸດເສຍຊີວິດຈຳນວນບໍ່ໜ້ອຍແຕ່ກໍບໍ່ສາມາດຢືນຢັນໄດ້ຢ່າງຈະແຈ້ງວ່າມີເທົ່າໃດ? ປັດຈຸບັນ, ກອງທັບລັດຖະບານຟີລິບປິນພວມເພີ່ມຂອບເຂດການປິດລ້ອມຜູ້ປະກອບອາວຸດຢູ່ເມືອງມາລາວີຕື່ມອີກ ແລະຈະສືບຕໍ່ກວາດລ້າງຢ່າງເດັດຂາດ.
ແນວໃດກໍດີ ຫວ່າງມໍ່ໆມານີ້, ເຈົ້າໜ້າທີ່ກອງທັບຟີລິບປິນກ່າວວ່າ: ການກວາດລ້າງຜູ້ປະກອບອາວຸດຈະໃຫ້ສຳເລັດກ່ອນວັນປະກາດເອກະລາດຟີລິບປິນທີ 12 ມິຖຸນາ.