ງານວາງສະແດງຜະລິດຕະພັນກົນຈັກໄຟຟ້າໃນງານວາງສະແດງສິນຄ້າຈີນ-ອາຊຽນ2017ໄດ້ຈັດຂຶ້ນຢູ່ສູນປະຊຸມວາງສະແດງສາກົນນະຄອນຫຼວງຮ່າໂນ້ຍປະເທດຫວຽດນາມໃນວັນທີ 15 ມິຖຸນານີ້ໂດຍມີ 106 ບໍລິສັດກົນຈັກໄຟຟ້າຈາກ 14 ແຂວງແລະເມືອງຂອງຈີນເຂົ້າຮ່ວມ.
ງານວາງສະແດງທີ່ຈະດຳເນີນເປັນເວລາ 3 ວັນນີ້ເປັນງານວາງສະແດງດ້ານວິຊາການທີ່ກອງເລຂາງານວາງສະແດງສິນຄ້າຈີນ-ອາຊຽນແລະກົມສົ່ງເສີມການຄ້າກະຊວງອຸດສາຫະກຳການຄ້າຫວຽດນາມຈັດຂຶ້ນຢູ່ຫວຽດນາມເປັນເທື່ອທຳອິດໂດຍຈະເນັ້ນວາງສະແດງຜະລິດຕະພັນທີ່ມີຄຸນນະພາບດີແລະເຕັກນິກກ້າວໜ້າໃນຂະແໜງການຕ່າງໆເປັນຕົ້ນ ກົນຈັກທົ່ວໄປ,ລົດຂົນສົ່ງ,ກົນຈັກກະສິກຳ,ກົນຈັກວິສະວະກຳ, ຂໍ້ມູນຂ່າວສານເອເລັກໂຕຣນິກ, ການບໍລິໂພກເອເລັກໂຕຣນິກທີ່ທັນສະໄໝແລະອື່ນໆ.
ທ່ານຫົງສຽວຢຸງ ເອກອັກຄະລັດຖະທູດຈີນປະຈຳຫວຽດນາມຢືນຢັນວ່າ ງານວາງສະແດງຄັ້ງນີ້ເປັນໂອກາດດີສຳລັບວິສາຫະກິດຈີນ-ຫວຽດນາມດຳເນີນການແລກປ່ຽນ,ການຮ່ວມມືກັນພັດທະນາ ເຊິ່ງຈະມີຜົນດີຕໍ່ທັງສອງຝ່າຍເພີ່ມຄວາມເຂົ້າໃຈກັນແລະເປີດກວ້າງການຮ່ວມມືທີ່ເປັນຮູບປະທຳ.