ທ່ານໂດນັນທຣຳ ປະທານາທິບໍດີອາເມລິກາຖະແຫຼງໃນວັນທີ 16 ມິຖຸນານີ້ວ່າ: ຈະຮັດກຸມນະໂຍບາຍດ້ານເສດຖະກິດການຄ້າ,ການທ່ອງທ່ຽວແລະອື່ນໆທີ່ປະຕິບັດຕໍ່ກູບາເຊິ່ງຕົກລົງໂດຍລັດຖະບານໂອບາມາ, ແຕ່ຈະບໍ່ປິດສະຖານທູດອາເມລິກາປະຈຳກູບາທີ່ເປີດຄືນເມື່ອປີ 2015.
ວັນທີ 17 ທັນວາ 2014, ທ່ານບາຣັກ ໂອບາມາ ປະທານາທິບໍດີອາເມລິກາແລະທ່ານລາວ ກັສໂຕຣ ຜູ້ນຳກູບາໄດ້ປະກາດເປີດຂະບວນການຫັນສາຍພົວພັນທາງການທູດລະຫວ່າງສອງປະເທດໃຫ້ເປັນປົກກະຕິ ແລະສອງປະເທດໄດ້ຟື້ນຟູສາຍພົວພັນທາງການທູດຢ່າງເປັນທາງການໃນເດືອນກໍລະກົດ 2015. ແຕ່ວ່າ ມາຮອດທ້າຍເດືອນພະຈິກປີ 2016 ຜ່ານມາ, ທ່ານທຣຳໄດ້ຢືນຢັນວ່າ ຖ້າຫາກກູບາບໍ່ສາມາດບັນລຸບາງເປົ້າໝາຍພິເສດໄດ້, ຕົນຈະຢຸດຂະບວນການຫັນສາຍພົວພັນລະຫວ່າງສອງປະເທດໃຫ້ເປັນປົກກະຕິ.