ວັນທີ 16 ມິຖຸນານີ້, ກອງປະຊຸມປະຈຳປີຂອງທະນາຄານລົງທຶນພື້ນຖານໂຄງລ່າງອາຊີ ຫຼື AIIB ຄັ້ງທີ 2 ໄດ້ຈັດຂຶ້ນຢູ່ສູນວາງສະແດງສາກົນເຈຈູຂອງສ.ເກົາຫຼີ. ກອງປະຊຸມປະຈຳປີທີ່ຈະດຳເນີນເປັນເວລາ 3 ວັນເທື່ອນີ້ມີຫົວຂໍ້ວ່າ 'ພື້ນຖານໂຄງລ່າງແບບຍືນຍົງ', ຄະນະຜູ້ແທນສະມາຊິກ AIIB, ບຸກຄົນວົງການການທະນາຄານ ແລະ ວົງການວິສາຫະກິດປະເທດຕ່າງໆ 2 ພັນກວ່າຄົນໄດ້ເຂົ້າຮ່ວມກອງປະຊຸມເທື່ອນີ້.
ທ່ານຈິ່ນລີ້ຊູນ ຜູ່ອຳນວຍການໃຫຍ່ AIIB ແນະນຳວ່າ, ໃນເດືອນມັງກອນປີ 2016 ທີ່ AIIB ຫາກໍ່ສ້າງຕັ້ງຂຶ້ນນັ້ນມີ 57 ສະມາຊິກ, ເດືອນມີນາ ແລະ ເດືອນພຶດສະພາປີນີ້ກໍ່ມີ 20 ປະເທດ ແລະ ເຂດແຄວ້ນເຂົ້າເປັນສະມາຊິກ, ບວກກັບ3ປະເທດທີ່ເຂົ້າເປັນສະມາຊິກໃໝ່ໃນວັນທີ 16 ເດືອນນີ້ ມາຮອບປັດຈຸບັນ, AIIB ໄດ້ມີ 80 ສະມາຊິກ ແລ້ວ. ທ່ານຊີ້ອອກວ່າ, ການຈັດສັນ ແລະ ເພີ່ມທະວີພື້ນຖານໂຄງລ່າງ ແລະ ການເຊື່ອມຕໍ່ລະຫວ່າງອາຊີ ແລະ ເຂດອື່ນໆໃນໂລກນັ້ນມີຜົນສະທ້ອນອັນເລິກເຊິ່ງ ແລະ ຍາວໄກຕໍ່ເສດຖະກິດໂລກ, ທ່ານຍັງໄດ້ເນັ້ນຄວາມສຳຄັນທີ່ຮ່ວມມື ແລະ ຕ່າງຝ່າຍຕ່າງໄດ້ຮັບຜົນປະໂຫຍດ.