ຫວ່າງມໍ່ໆນີ້, ເຟັດບຸກ ເຊິ່ງເປັນສື່ສັງຄົມອອນໄລອາເມລິກາກ່າວວ່າ, ສື່ສັງຄົມອອນໄລບໍ່ຄວນກາຍເປັນບ່ອນທີ່ຜູ້ກໍ່ການຮ້າຍສະແດງຄວາມເຫັນ, ຂະນະທີ່ໄດ້ປະກາດມາດຕະການຂອງຕົນທີ່ໄດ້ເຮັດແນວໃດ ເພື່ອປ້ອງກັນບໍ່ໃຫ້ຖືກນຳໃຊ້ໂດຍຜູ້ກໍ່ການຮ້າຍ ໂດຍຜ່ານເຕັກນິກໃໝ່, ແຮງງານຂອງຄົນ ແລະ ການຮ່ວມມືກັບຕ່າງປະເທດ.
ໃນຫຼາຍປີມໍ່ໆມານີ້,ການໂຈມຕີແບບກໍ່ການຮ້າຍໄດ້ເກີດຂຶ້ນຢູ່ທຸກຫົນທຸກແຫ່ງຂອງໂລກໃນບາງຄັ້ງບາງຄາວ,ຈາກນີ້, ຜູ່ຊ່ຽວຊານດ້ານຄວາມປອດໄພ ແລະ ອົງການຈັດຕັ້ງປະຊາຊົນໄດ້ຕິຕຽນສື່ສັງຄົມອອນໄລທີ່ມີອິດທິພົນກວ້າງຂວາງຈຳນວນໜຶ່ງຖືກນຳໃຊ້ໂດຍຜູ້ກໍ່ການຮ້າຍເພື່ອດຳເນີນການໂຄສະນາ ແລະ ປະກາດຮັບສະໝັກສະມາຊິກຂອງຕົນ ເຊິ່ງເຟັສບຸກທີ່ມີຜູ້ໃຊ້ເກືອບ 2 ຕື້ຄົນໃນໂລກນັ້ນກໍ່ແມ່ນສື່ໜຶ່ງ.
ໂດຍແນໃສ່ຄວາມສົງໄສດັ່ງກ່າວ, ທ່ານນາງໂມນີກາ ບິເກີດ ຜູ້ອຳນວຍການໃຫຍ່ນະໂຍບາຍທົ່ວໂລກ ແລະ ທ່ານແປຣນ ຟິສມານ ຜູ້ອຳນວຍການນະໂຍບາຍຕ້ານການກໍ່ການຮ້າຍຂອງເຟັດບຸກໄດ້ໃຫ້ຄຳຕອບໂດຍຜ່ານກະທູ້ຢູ່ເວັບໄຊທາງການຂອງບໍລິສັດຕົນ ໂດຍກ່າວວ່າ, ເມື່ອບໍລິສັດຕົນປາກົດເຫັນວ່າ ຢູ່ໜ້າເຟັດບຸກມີຜູ້ກໍ່ການຮ້າຍ ຫຼື ເນື້ອໃນທີ່ສະໜັບສະໜູນລັດທິກໍ່ການຮ້າຍ, ກໍ່ຈະຂອງຖິ້ມ ທັນທີ. ແຕ່ເຟັດບຸກມີຜູ້ໃຊ້ເກືອບ 2 ຕື້ຄົນທີ່ຕັ້ງກະທູ້ ແລະ ປະກອບຄຳເຫັນດ້ວຍ 80 ກວ່າພາສາຈາກແຫ່ງຕ່າງໆທົ່ວໂລກ,ສົ່ງຜົນເຮັດໃຫ້ການຮັບປະກັນຄວາມປອດໄພນັ້ນກາຍເປັນສິ່ງທ້າທາຍອັນໃຫຍ່ຫຼວງ.
ພາຍໃຕ້ຄວາມກົດດັນທີ່ໂລກພາຍນອກຮຽກຮ້ອງໃຫ້ສື່ສັງຄົມອອນໄລນຳໃຊ້ມາດຕະການເພື່ອໂຈມຕີການເຄື່ອນໄຫວແບບກໍ່ການຮ້າຍຫຼາຍກວ່າເກົ່າ, ທຸຍເຕີ (Twitter) ເຊິ່ງເປັນສື່ສັງຄົມອອນໄລທີ່ມີອິດທິພົນໃຫຍ່ອີກສື່ໜຶ່ງຂອງອາເມລິກາກໍ່ເຄີຍແນະນຳວຽກງານຕ້ານການກໍ່ການຮ້າຍຂອງຕົນ. ສຳລັບທຸຍເຕີແລ້ວ ມີຜູ້ໃຊ້ຫຼາຍກວ່າ 500 ລ້ານຄົນໃນໂລກ,ເດືອນສິງຫາ ປີ2016, ກໍປະກາດວ່າ, ໃນປີທີ່ຜ່ານໄປນັ້ນ, ໄດ້ປິດ ID ຂອງຜູ້ໃຊ້ທີ່ໂຄສະນາຄວາມຮຸນແຮງ ແລະ ລັດທິກໍ່ການຮ້າຍນັ້ນ 3 ແສນ 6 ໝື່ນຄົນ, ໃນນັ້ນມີຫຼາຍຄົນກ່ຽວພັນກັບກຸ່ມ IS.