ຕາມຂ່າວສານຈີນ: ເຈົ້າໜ້າທີ່ໜ່ວຍກວດກາແລະຢືນຢັນຂອງຫ້ອງການດ່ານພາສີເຂດປົກຄອງຕົນເອງເຜົ່າຈ້ວງກວາງຊີ ສປ ຈີນ ໄດ້ສຳເລັດການກວດກາແລະຮັບຮອງເອົາເຂດການຄ້າຊາຍແດນລົງປາງເມືອງຈີ້ງຊີ່ທີ່ຢູ່ຊາຍແດນຈີນ-ຫວຽດນາມໃນວັນທີ 16 ມິຖຸນານີ້ແລ້ວ.
ເຈົ້າໜ້າທີ່ອົງການກວດຄົນເຂົ້າອອກເມືອງ, ກວດກາຄຸນນະພາບແລະກັກກັນພະຍາດເຂດກວາງຊີໃຫ້ຮູ້ວ່າ, ການຄ້າຊາຍແດນຢູ່ດ່ານພາສີລົງປາງຄຶກຄັກຫຼາຍ ເຮັດໃຫ້ຈຸດການຄ້າຂາຍທີ່ມີຢູ່ແລ້ວນັ້ນ ບໍ່ສາມາດຮອງຮັບການຂະຫຍາຍຕົວຂອງການຄ້າ ຈຶ່ງຕ້ອງການຍົກລະດັບເຂດການຄ້າຊາຍແດນໂດຍດ່ວນ.
ຂ່າວແຈ້ງວ່າ, ເຂດການຄ້າຊາຍແດນລົງປາງທີ່ຜ່ານການກວດກາແລະຮັບຮອງເທື່ອນີ້ ຕັ້ງຢູ່ສູນການຄ້າແລະຈໍລະຈອນສິນຄ້າສາກົນວ້ານເຊິ່ງລົງເຂດກວາງຊີ ໂດຍກວມເນື້ອທີ່ 5 ເຮັກຕາ. ປັດຈຸບັນ, ເຂດການຄ້າດັ່ງກ່າວ ປະກອບມີເຂດກວດກາຄຸນນະພາບແລະກັກກັນພະຍາດ, ສາງແຊ່ເຢັນ, ສະຖານທີ່ກວດກາຂອງດ່ານພາສີ ແລະພື້ນຖານໂຄງລ່າງອື່ນໆ, ທັງມີສູນກວດກາຄຸນນະພາບ, ກັກກັນພະຍາດແລະຮ້ອງຂໍຜ່ານດ່ານ, ສູນຊຳລະສະສາງຂ້າມຊາດແລະພາຍໃນປະເທດ, ອຸປະກອນຮ້ອງຂໍຜ່ານດ່ານສຳລັບປະຊາຊົນໂດຍຕົນເອງ ແລະອື່ນໆ ເຊິ່ງສາມາດຕອບສະໜອງຄວາມຕ້ອງການຂອງປະຊາຊົນເຂດຊາຍແດນໃນການຈັດຊື້, ຮ້ອງຂໍຜ່ານດ່ານ ແລະຊຳລະສະສາງຢູ່ບ່ອນດຽວກັນໄດ້ໂດຍພື້ນຖານ.