ການພົບປະລະຫວ່າງລັດຖະມົນຕີການຕ່າງປະເທດເບຣຊິນ,ຣັດເຊຍ,ອິນເດຍ,ຈີນແລະອາຟຣິກກາໃຕ້ຫຼືBRICSໄດ້ຈັດຂຶ້ນຢູ່ຫໍຮັບແຂກຕ້ຽວຢູຖາຍນະຄອນຫຼວງປັກກິ່ງ ສປ ຈີນໃນວັນທີ 19 ມິຖຸນານີ້ໂດຍການເປັນປະທານຂອງທ່ານຫວາງຢີ້ ລັດຖະມົນຕີການຕ່າງປະເທດຈີນ ແລະທ່ານມາຊາບາເນ ລັດຖະມົນຕີກະຊວງການພົວພັນສາກົນແລະການຮ່ວມມືອາຟຣິກກາໃຕ້, ທ່ານອາລອຍຊິໂອ ນູເນັສ ລັດຖະມົນຕີກະຊວງການຕ່າງປະເທດເບຣຊິນ, ທ່ານເຊີເກ ລັຟຣົຟ ລັດຖະມົນຕີກະຊວງການຕ່າງປະເທດຣັດເຊຍ ແລະທ່ານວິຈາຍ ຄູມາ ຊີງ ລັດຖະມົນຕີກະຊວງການຕ່າງປະເທດອິນເດຍເຂົ້າຮ່ວມ.
ລັດຖະມົນຕີການຕ່າງປະເທດທັງ 4 ປະເທດໄດ້ຕີລາຄາສູງຕໍ່ທຸກວຽກງານທີ່ຈີນປະຕິບັດຜ່ານມາໃນຖານະເປັນປະເທດປະທານໝູນວຽນຂອງບຣິກສ ທັງໃຫ້ຄຳໝັ້ນສັນຍາວ່າຈະພະຍາຍາມສະໜັບສະໜູນແລະປະສານສົມທົບກັບຈີນຢ່າງສຸດຂີດເພື່ອກະກຽມກອງປະຊຸມພົບປະຂອງຜູ້ນຳບຣິກສຄັ້ງທີ 9 ປະສົບຜົນສຳເລັດຢ່າງຈົບງາມ.
ໃນການພົບປະ, ລັດຖະມົນຕີການຕ່າງປະເທດ 5 ປະເທດໄດ້ທົບທວນແລະສະຫຼຸບຜົນສຳເລັດລວມທັງຖອດຖອນບົດຮຽນໃນການຮ່ວມມືລະຫວ່າງ 5 ປະເທດໃນໄລຍະ 10 ປີຜ່ານມາ ແລະຍັງໄດ້ລົງເລິກຄົ້ນຄວ້າຫາລືການພັດທະນາການຮ່ວມມືຂອງບຣິກສໃນບາດກ້າວຕໍ່ໄປ ກໍຄືສະຖານະການສາກົນແລະບັນຫາຈຸດສຸມໃນປັດຈຸບັນ.
ຫຼັງການພົບປະ, ລັດຖະມົນຕີການຕ່າງປະເທດ 5 ປະເທດໄດ້ຖະແຫຼງຂ່າວຮ່ວມກ່ຽວກັບການພົບປະລະຫວ່າງລັດຖະມົນຕີການຕ່າງປະເທດບຣິກສ.