ຕາມຂ່າວ CRI: ວັນທີ 20 ກໍລະກົດນີ້ ທ່ານອາຄົມ ເຕີມພິທະຍາໄພສິດ ລັດຖະມົນຕີກະຊວງຄົມມະນາຄົມໄທໄດ້ເນັ້ນວ່າ, ທາງລົດໄຟໄທ-ຈີນຈະສ້າງຜົນປະໂຫຍດໃຫ້ແກ່ປະເທດຕົນຢ່າງຮອບດ້ານ ແລະກໍ່ຄາດວ່າ ລັດຖະບານຈະສຳເລັດການພິຈາລະນາໂຄງການດັ່ງກ່າວລະຫວ່າງເດືອນກຸມພາ-ກໍລະກົດ ແລະໄວສຸດຈະເລີ່ມກໍ່ສ້າງແຕ່ເດືອນສິງຫາ- ກັນຍາເປັນຕົ້ນໄປ.
ທ່ານອາຄົມຢືນຢັນວ່າ, ໂຄງການທາງລົດໄຟໄທ-ຈີນທີ່ໄລຍະທາງລວມຍາວ 252, 5 ກິໂລແມັດແຕ່ບາງກອກ- ນະຄອນຣາຊະສີມາຈະໃຊ້ງົບປະມານ 179 ຕື້ 412 ລ້ານບາດ ໂດຍໄທຈະລົງທຶນຝ່າຍດຽວ 100% ເຊິ່ງໂຄງການນີ້ຈະມີຮູບການລົງທຶນຕ່າງກັບໂຄງການທາງລົດໄຟລາວ-ຈີນທີ່ ຈີ ລົງທຶນເປັນຫຼັກ, ໝາຍວ່າລັດຖະບານໄທຈະມີສິດພັດທະນາ ທຸລະກິດແລະຄຸ້ມຄອງທີ່ດິນທີ່ຢູ່ລຽບຕາມທາງລົດໄຟ ແລະກົມທາງລົດໄຟໄທຈະຮັບຜິດຊອບໂຄງການຢ່າງຮອບດ້ານ ເພື່ອຊຸກຍູ້ໃຫ້ເຂດຢູ່ລຽບຕາມທາງລົດໄຟສາຍນີ້ບັນລຸການພັດທະນາ. ຂະນະດຽວກັນ ລັດຖະບານໄທຈະຮັບເອົາພາກເອກະຊົນທີ່ມີກຳລັງຕົວຈິງນັ້ນເຂົ້າມາມີສ່ວນຮ່ວມໃນການບໍລິຫານທາງລົດໄຟໄທ-ຈີນ.