ຕາມຂ່າວCRI: ທ່ານຢ໋າງເຈຍສື ທີ່ປຶກສາແຫ່ງລັດຈີນ, ທ່ານເຣກສ໌ ຕີເລີຊັນ ລັດຖະມົນຕີກະຊວງການຕ່າງປະເທດ ແລະທ່ານຈິມ ມາຕິສ໌ ລັດຖະມົນຕີກະຊວງປ້ອງກັນປະເທດອາເມລິກາໄດ້ເປັນປະທານຮ່ວມປຶກສາຫາລືວຽກງານການຕ່າງປະເທດແລະຄວາມໝັ້ນຄົງຈີນ-ອາເມລິກາຮອບທຳອິດ ທີ່ນະຄອນຫຼວງວໍຊິງຕັນໃນວັນທີ 21 ມິຖຸນານີ້.
ສອງຝ່າຍຢືນຢັນວ່າ, ຈະສືບຕໍ່ປະຕິບັດຕາມຄວາມເປັນເອກະພາບກັນທີ່ສຳຄັນລະຫວ່າງປະມຸກລັດສອງປະເທດ, ພະຍາຍາມເປີດກວ້າງຂົງເຂດຮ່ວມມືທີ່ຕ່າງຝ່າຍຕ່າງມີຜົນປະໂຫຍດຮ່ວມກັນ, ຄວບຄຸມຄວາມເຫັນທີ່ຂັດແຍ້ງກັນ ແລະຊຸກຍູ້ໃຫ້ສາຍພົວພັນຈີນ-ອາເມລິກາຂະຫຍາຍຕົວຢ່າງປອດໃສ, ໝັ້ນຄົງແລະຍາວນານ ບົນພື້ນຖານເຄົາລົບເຊິ່ງກັນແລະກັນ. ສອງຝ່າຍເຫັນວ່າ, ການທີ່ທ່ານປະທານາທິບໍດີທຣຳຈະຢ້ຽມຢາມຈີນໃນປີນີ້ຕາມຄຳເຊີນຂອງທ່ານປະທານສີຈິ້ນຜິງ ຍ່ອມຈະປະສົບຜົນສຳເລັດຢ່າງຈົບງາມ. ຂະນະດຽວກັນທັງສອງຝ່າຍລ້ວນແຕ່ຫວັງໃຫ້ມີການຫາລືຮອບທຳອິດຂອງຫຼາຍກົນໄກການຫາລືລະດັບສູງລະຫວ່າງສອງປະເທດກ່ຽວກັບເສດຖະກິດ, ການປະຕິບັດກົດໝາຍ, ຄວາມປອດໄພທາງອິນເຕີເນັດ, ສັງຄົມ ແລະວັດທະນະທຳ ແລະຫວັງໃຫ້ທຸກໆການປຶກສາຫາລືໄດ້ຮັບຜົນສຳເລັດຢ່າງຈົບງາມ.
ນອກນີ້, ສອງຝ່າຍຍັງເຫັນວ່າ, ການປຶກສາຫາລືວຽກງານການຕ່າງປະເທດແລະຄວາມໝັ້ນຄົງຈີນ-ອາເມລິກາຮອບທຳອິດມີລັກສະນະສ້າງສັນແລະໄດ້ຮັບຜົນສຳເລັດທີ່ອຸດົມສົມບູນ ແລະເຫັນດີຈະສືບຕໍ່ນຳໃຊ້ກົນໄກດັ່ງກ່າວ ເພື່ອເພີ່ມຄວາມໄວ້ເນື້ອເຊື່ອໃຈກັນ, ເປີດກວ້າງຄວາມເຫັນທີ່ເປັນເອກະພາບກັນ, ຊຸກຍູ້ການຮ່ວມມືກັນ, ຄວບຄຸມຄວາມເຫັນທີ່ຂັດແຍ້ງກັນ ເພື່ອຕັ້ງໜ້າເສີມຂະຫຍາຍບົດບາດຊຸກຍູ້ສາຍພົວພັນຈີນ-ອາເມລິກາໃຫ້ຂະຫຍາຍຕົວດີກວ່າເກົ່າ.
 |
