ເວລາ 12 ໂມງຂອງວັນທີ 24 ມິຖຸນານີ້, ອົງການປົກຄອງແຂວງເສສວນຈີນໄດ້ຈັດກອງປະຊຸມຂ່າວກ່ຽວກັບເຫດການດິນພູເຈື່ອນທີ່ເກີດຂຶ້ນຢູ່ຕາແສງມ້າວກິ່ງແຂວງອາບາ ໂດຍໄດ້ເຜີຍໃຫ້ຮູ້ວ່າ: ເວລາປະມານ 6 ໂມງວັນທີ 24 ມິຖຸນານີ້, ໄດ້ເກີດໄພດິນພູເຈື່ອນຢູ່ບ້ານຊິ່ນມົ້ວເມືອງເຕຍຊີ່ຕາແສງມ້າວກິ່ງແຂວງອາບາ, ເຮັດໃຫ້ເຮືອນຊາວບ້ານ 46 ຄອບຄົວຖືກຝັງ, 141 ຄົນຫາຍສາບສູນ, ຕັນທາງນ້ຳ 2 ກິໂລແມັດ, ເສັ້ນທາງ 1600 ກວ່າແມັດຖືກຝັງ.
ມາຮອດປະຈຸບັນ,ແຂວງເສສວນໄດ້ເລີ່ມປະຕິບັດການຮັບມືກັບໄພທຳມະຊາດຢ່າງສຸກເສີນລະດັບໜຶ່ງ, ແລະໄດ້ສົ່ງໜ່ວຍງານແລະກອງກູ້ໄພໄປຊ່ວຍເຫຼືອຢູ່ເຂດປະສົບໄພ, ພ້ອມກັນນັ້ນ, ຍັງໄດ້ຄຸ້ມຄອງການຈະລາຈອນຕໍ່ເສັ້ນທາງໄປສູ່ເຂດປະສົບໄພ, ແລະເປີດເສັ້ນທາງກອບກູ້ຊີວິດ.
ທ່ານຖາງລີ້ໝີນ ໂຄສົກອົງການປົກຄອງແຂວງເສສວນສະເໜີໃຫ້ຮູ້ວ່າ: ປະຈຸບັນ, ແຂວງເສສວນໄດ້ສົ່ງກອງກູ້ໄພດັບເພີງ 120 ກວ່າຄົນ, ກອງກູ້ໄພບໍ່ແຮ່ 100 ກວ່າຄົນ, ກອງກູ້ໄພທາງແລະຂົວ 30 ກວ່າຄົນ, ກອງກູ້ໄພໄຟຟ້າ 50 ກວ່າຄົນ, ແລະໄດ້ນຳເອົາອຸປະກອນກູ້ໄພຕ່າງໆເຊັ່ນ ເຄື່ອງແຕກຫີນ ເຄື່ອງຂຸດຄົ້ນ ອຸປະກອນຄົ້ນຫາຊີວິດແລະອື່ນໆໄປໃຫ້ຄວາມຊ່ວຍເຫຼືອຢູ່ເຂດປະສົບໄພ, ວຽກງານກູ້ໄພກຳລັງດຳເນີນໄປຢ່າງເປັນປົກກະຕິ.
ສູນບັນຊາການຮັບມືກັບກໍລະນີສຸກເສີນອົງການປົກຄອງແຂວງເສສວນຮຽກຮ້ອງໃຫ້ປະຊາຊົນແລະລົດສັງຄົມຢ່າເຂົ້າໄປເຂດປະສົບໄພໃນໄລຍະນີ້.
