ວັນທີ 23 ມິຖຸນານີ້, ໃນເວລາໃຫ້ສຳພາດຕໍ່ນັກຂ່າວ ຮ່ວມກັບທ່ານເກບຣັນ ບາຊິວ ລັດຖະມົນຕີການຕ່າງປະເທດລີບັງ, ທ່ານວາງອີ້ ລັດຖະມົນຕີກະຊວງການຕ່າງປະເທດຈີນໄດ້ບັນລະຍາຍຫຼັກໝັ້ນຂອງຈີນກ່ຽວກັບບັນຫາຊາວອົບພະຍົບເຂດຕາເວັນອອກກາງ.
ທ່ານວາງອີ້ກ່າວວ່າ, ປັດຈຸບັນນີ້, ບັນຫາຊາວອົບພະຍົບຂອງເຂດຕາເວັນອອກກາງພົ້ນເດັ່ນຫຼາຍ, ປະເທດຕາເວັນອອກກາງຕ່າງໆ ເຊິ່ງລວມທັງ ລີບັງ ໄດ້ທຳຄວາມພະຍາຍາມຢ່າງຫຼວງຫຼາຍ ເພື່ອຮັບເອົາຊາວອົບພະຍົບຈາກຊີຣີແລະປະເທດອື່ນໆ. ຊາວອົບພະຍົບບໍ່ແມ່ນຊາວຍົກຍ້າຍ. ຊາວອົບພະຍົບທີ່ອອກຈາກບ້ານເກີດເມືອງນອນໄປອາໄສຢູ່ແຫ່ງຕ່າງໆໃນໂລກນັ້ນ ສຸດທ້າຍຍັງຕ້ອງກັບຄືນປະເທດຊາດຂອງຕົນ, ສ້າງບ້ານແປງເມືອງຄືນໃໝ່. ນີ້ແມ່ນຄວາມປາຖະໜາໃນໃຈຂອງຊາວອົບພະຍົບທຸກຄົນ, ແລະກໍ່ສອດຄ່ອງກັບທິດທາງແຫ່ງຄວາມພະຍາຍາມຂອງມະນຸດສະທຳສາກົນ, ພ້ອມກັນນັ້ນ, ກໍ່ແມ່ນສ່ວນປະກອບຂອງມະຕິກ່ຽວກັບການແກ້ໄຂບັນຫາຊີຣີດ້ວຍວິທີການເມືອງຂອງສະພາຄວາມໝັ້ນຄົງສະຫະປະຊາຊາດ.
ທ່ານວາງອີ້ກ່າວວ່າ, ການແກ້ໄຂບັນຫາຊາວອົບພະຍົບຂອງເຂດຕາເວັນອອກກາງ, ກ່ອນອື່ນໝົດ, ຕ້ອງເລັ່ງລັດຂະບວນການແກ້ໄຂບັນຫາຊີຣີດ້ວຍວິທີການເມືອງ, ເພື່ອສ້າງເງື່ອນໄຂອັນຈຳເປັນໃຫ້ຊາວອົບພະຍົບກັບຄືນປະເທດຕົນ. ຄວາມປັ່ນປ່ວນແລະຄວາມທຸກຍາກແມ່ນສາເຫດພື້ນຖານທີ່ພາໃຫ້ເກີດບັນຫາຊາວອົບພະຍົບ. ການແກ້ໄຂບັນຫາຊາວອົບພະຍົບຢ່າງເຖິງຖອງ, ຕ້ອງແກ້ໄຂຈາກຂັ້ນພື້ນຖານ, ປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນດ້ວຍການພັດທະນາ, ສ້າງສະພາບແວດລ້ອມອັນຈຳເປັນເພື່ອໃຫ້ຊາວອົບພະຍົບຫຼຸດພົ້ນອອກຈາກຄວາມທຸກຍາກ.
ທ່ານວາງອີ້ກ່າວວ່າ, ໃນໄລຍະຍາວດົນນານມານີ້, ລັດຖະບານຈີນໄດ້ຍຶດໝັ້ນນ້ຳໃຈມະນຸດສະທຳມາໂດຍຕະຫຼອດ, ອຳນວຍຄວາມຊ່ວຍເຫຼືອໃຫ້ແກ່ປະເທດທີ່ຮັບເອົາຊາວອົບພະຍົບຕາມຄວາມສາມາດຂອງຕົນ ພາຍໃຕ້ຂອບສະຫະປະຊາຊາດ. ຈີນຍິນດີຮ່ວມກັນກັບປະຊາຄົມໂລກ, ທຳຄວາມພະຍາຍາມສຸດຂີດເພື່ອ ຊຸກຍູ້ໃຫ້ບັນຫາຈຸດສຸມຜ່ອນຄາຍລົງ, ຊ່ວຍເຫຼືອປະເທດທີ່ຮັບເອົາຊາວອົບພະຍົບຍົກສູງຄວາມສາມາດໃນການຮັບມືກັບວິກິດການ, ແລະປະກອບສ່ວນຂອງຕົນເຂົ້າໃນການຊ່ວຍໃຫ້ຊາວອົບພະຍົບບັນລຸຄວາມປາຖະໜາ ທີ່ກັບຄືນບ້ານເກີດເມືອງນອນ.
 |
