ວັນທີ 23 ມິຖຸນານີ້, ກອງປະຊຸມສຸດຍອດສະຫະພາບເອີລົບລະດູຮ້ອນ ທີ່ກຳລັງຈັດຂຶ້ນຢູ່ນະຄອນບຣຸກແຊນໄດ້ອອກຖະແຫຼງການ, ໂດຍກ່າວຢ້ຳເຖິງຄວາມຕັດສິ້ນໃຈໃນການດຳເນີນການປະຕິຮູບຕໍ່ລະບຽບການປົກປ້ອງຮ່ວມກັນຂອງເອີລົບ, ເພື່ອຮັບມືກັບບັນຫາຊາວອົບພະຍົບທີ່ນັບມື້ນັບພົ້ນເດັ່ນຂຶ້ນ.
ໃນລະດູຮ້ອນປີ 2015, ມີຊາວອົບພະຍົບເຂດຕາເວັນອອກກາງຫຼາຍກວ່າລ້ານຄົນຜ່ານຕວກກີເຂົ້າໃນເກຼັກ, ແລ້ວເຂົ້າໃນປະເທດເອີລົບອື່ນໆ, ພາໃຫ້ເອີລົບປະກົດມີກະແສຊາວອົບພະຍົບທີ່ໃຫຍ່ທີ່ສຸດຫຼັງຈາກສົງຄາມໂລກຄັ້ງທີສອງ.
ໃນເດືອນກັນຍາປີ 2015, ປະເທດສະມາຊິກສະຫະພາບເອີລົບໄດ້ລົງຄະແນນສຽງຜ່ານຮັບຮອງແຜນການຈັດວາງບ່ອນເພີ່ງພາອາໄສໃຫ້ຊາວອົບພະຍົບ, ເຫັນດີໃຫ້ປະເທດສະມາຊິກຮັບເອົາຊາວອົບພະຍົບ 1 ແສນ 2 ໝື່ນຄົນທີ່ອົບພະຍົບໄປອີຕາລີ ເກຼັກ ແລະປະເທດອື່ນໆ ພາຍໃນສອງປີ, ກ່ອນນັ້ນ, ໃນເດືອນດຽວກັນ, ປະເທດສະມາຊິກສະຫະພາບເອີລົບໄດ້ເຫັນດີອຳນວຍບ່ອນເພີ່ງພາອາໄສໃຫ້ຊາວອົບພະຍົບ 4 ໝື່ນຄົນ, ລວມທັງໝົດແລ້ວ, ປະເທດສະມາຊິກສະຫະພາບເອີລົບມີແຜນອຳນວຍບ່ອນເພີ່ງພາອາໄສໃຫ້ຊາວອົບພະຍົບ 1 ແສນ 6 ໝື່ນຄົນ ພາຍໃນ 2 ປີ.
ໂດຍປະເຊີນໜ້າກັບແຮງກົດດັນທາງດ້ານຊາວພະຍົບທີ່ນັບມື້ນັບໜັກໜ່ວງຂຶ້ນ, ເຖິງແມ່ນວ່າ ພາຍໃນສະຫະພາບເອີລົບ ມີນະໂຍບາຍຮ່ວມກັນສຳລັບການໃຫ້ຊາວອົບພະຍົບສະເໜີລີ້ໄພ, ແຕ່ວ່າ, ປະເທດຕ່າງໆຂອງສະຫະພາບເອີລົບ ພັດມີການປະຕິບັດຂອງໃຜຂອງລາວ, ຜົນການປະຕິບັດນະໂຍບາຍຕົວຈິງບໍ່ໄດ້ດີພໍສົມຄວນ.
ວັນທີ 22 ມິຖຸນານີ້, ກອງປະຊຸມສຸດຍອດສະຫະພາບເອີລົບລະດູຮ້ອນ ໄດ້ຈັດຂຶ້ນຢູ່ນະຄອນຫຼວງບຣຸກແຊນຂອງແບນຊິກ, ຕົ້ນຕໍຫາລືການຕ້ານການກໍ່ການຮ້າຍ, ອັງກິດຖອນອອກຈາກສະຫະພາບເອີລົບ, ວິກິດການຊາວອົບພະຍົບ, ພ້ອມທັງຫົວຂໍ້ດ້ານເສດຖະກິດການຄ້າ ແລະອື່ນໆ.
 |
