ກອງທັບປ້ອງກັນຊາດອິສຣາແອນຖະແຫຼງໃນວັນທີ 24 ມິຖຸນານີ້ວ່າ: ກອງທັບອາກາດປະເທດຕົນໄດ້ໂຈມຕີທາງອາກາດຕໍ່ທະຫານຊີຣີເພື່ອເປັນການແກ້ແຄ້ນທີ່ຊີຣີຍິງປືນໃສ່ອິສຣາແອນກ່ອນໜ້ານີ້.
ໂຄສົກກອງທັບປ້ອງກັນຊາດອິສຣາແອນຢືນຢັນວ່າ ຕອນເຊົ້າວັນທີ 24 ມິຖຸນານີ້, ເຂດພູພຽງໂກລານທີ່ປະເທດຕົນຄວບຄຸມນັ້ນຖືກໂຈມຕີດ້ວຍການຍິງປືນຫຼາຍລູກມາຈາກດິນແດນຊີຣີ, ແຕ່ບໍ່ໄດ້ເຮັດໃຫ້ມີຜູ້ເສຍຊີວິດແລະບາດເຈັບກໍຄືຜົນເສຍຫາຍອື່ນໆ. ຈາກນັ້ນ, ກໍໄດ້ເປີດການໂຈມຕີທາງອາກາດໃສ່ຫຼາຍເປົ້າໝາຍທາງການທະຫານຂອງກອງທັບລັດຖະບານຊີຣີເຊັ່ນລົດຕັງແລະອື່ນໆ.
ໂຄສົກກອງທັບປ້ອງກັນຊາດອິສຣາແອນກ່າວຕື່ມວ່າ: ກອງທັບປະເທດຕົນບໍ່ອະນຸຍາດໃຫ້ມີການປະຕິບັດທາງການທະຫານໃດໆທີ່ທຳລາຍອະທິປະໄຕແລະຄວາມປອດໄພຂອງປະຊາຊົນອິສຣາແອນ, ລັດຖະບານຊີຣີຄວນຮັບຜິດຊອບຕໍ່ກໍລະນີດັ່ງກ່າວ.ຂະນະທີ່ປັດຈຸບັນໄດ້ຍື່ນຄຳກ່າວຟ້ອງເລື່ອງນີ້ໃຫ້ກອງກຳລັງຕິດຕາມການຢຸດຕໍ່ສູ້ຂອງອົງການສະຫະປະຊາຊາດທີ່ປະຈຳຢູ່ເຂດຊາຍແດນລະຫວ່າງອິສຣາແອນກັບຊີຣີແລ້ວ.