ເຫດດິນພູເຈື່ອນຢູ່ເມືອງມ້າວຊຽນ ແຂວງເສສວນ ສປ ຈີນເຊິ່ງເຮັດໃຫ້ມີຜູ້ເສຍຊີວິດແລະບາດເຈັບນັ້ນ, ທ່ານອານໂຕນີໂອ ກູເຕີເຣັສ ເລຂາທິການໃຫຍ່ອົງການສະຫະປະຊາຊາດໄດ້ອອກຖະແຫຼງການໃນວັນທີ 24 ມິຖຸນານີ້ໂດຍສະແດງຄວາມເຫັນໃຈຕໍ່ປະຊາຊົນແລະລັດຖະບານຈີນ ທັງສະແດງຄວາມເສົ້າສະຫຼົດໃຈຕໍ່ຜູ້ເສຍຊີວິດແລະບາດເຈັບຈາກເຫດດັ່ງກ່າວ.
ຖະແຫຼງການລະບຸວ່າ: ທ່ານກູເຕີເຣັສຂໍອວຍພອນໃຫ້ຜູ້ບາດເຈັບຈົ່ງກັບຄືນສຸຂະພາບປົກກະຕິໂດຍໄວແລະຫາກມີຄວາມຕ້ອງການ, ອົງການສະຫະປະຊາຊາດກໍຍິນດີສະໜັບສະໜູນຈີນຕາມຄວາມສາມາດຂອງຕົນ.
ທັງນີ້ໃນຕອນເຊົ້າວັນທີ 24 ມິຖຸນານີ້, ຢູ່ເມືອງມ້າວຊຽນກິ່ງແຂວງອາປ້າແຂວງເສສວນໄດ້ເກີດດິນພູເຈື່ອນກະທັນຫັນ ເຊິ່ງເຮັດໃຫ້ 120 ກວ່າຄົນຖືກຝັງໃຕ້ດິນ. ປັດຈຸບັນ, ເຈົ້າໜ້າທີ່ກູ້ໄພໄດ້ພົບຜູ້ເສຍຊີວິດແລ້ວ 15 ສົບ. ຫຼັງເກີດໄພພິບັດ, ແຂວງດັ່ງກ່າວໄດ້ປະຕິບັດມາດຕະການສຸກເສີນກູ້ໄພທຳມະຊາດລະດັບ 1 ໂດຍສຸມທຸກກຳລັງເຂົ້າໄປກູ້ໄພຢ່າງຮີບດ່ວນ ເຊິ່ງປັດຈຸບັນເຈົ້າໜ້າທີ່ກູ້ໄພ 1000 ກວ່າຄົນແລະລົດກູ້ໄພ 150 ກວ່າຄັນກຳລັງປະຕິບັດໜ້າທີ່ກູ້ໄພຢູ່ສະຖານທີ່ເກີດເຫດ ແລະໄດ້ຊ່ວຍ 3 ຄົນອອກມາໄດ້ແລ້ວ ທັງອົບພະຍົບ 320 ຄົນໄປບ່ອນປອດໄພ.