ລັດຖະບານຊີຣີຖະແຫຼງໃນວັນທີ 24 ມິຖຸນານີ້ວ່າ: ໄດ້ປ່ອຍປະຊາຊົນຊີຣີ 672 ຄົນທີ່ຖືກຂັງເພື່ອເປົ້າໝາຍສ້າງຄວາມປອງດອງພາຍໃນຊາດ.
ຂ່າວສານຊີຣີລາຍງານວ່າ: ທ່ານຮີຊາມ ອັນຊາອາ ລັດຖະມົນຕີກະຊວງຍຸຕິທຳຊີຣີໄດ້ພົບປະກັບຜູ້ຖືກປ່ອຍຕົວໃນວັນທີ 24 ມິຖຸນານີ້ຢູ່ນະຄອນຫຼວງດາມັສ ທັງກ່າວວ່າ ຜູ້ທີ່ໄດ້ຮັບການປ່ອຍຕົວເຫຼົ່ານີ້ມາຈາກຫຼາຍເຂດແຂວງໃນປະເທດ, ໃນນີ້ ມີ 588 ຄົນ,ຍິງ 91ຄົນ ຖືກຂັງຢູ່ຄຸກສູນກາງນະຄອນຫຼວງດາມັສ.
ທ່ານຊາອາກ່າວວ່າ: ການທີ່ປ່ອຍຕົວນັກໂທດເຫຼົ່ານີ້ກໍເພື່ອສະແດງອອກເຖິງຄວາມຮັກແພງຕໍ່ປະຊາຊົນແລະເພີ່ມທະວີການສ້າງຄວາມປອງດອງພາຍໃນຊາດ ທັງເປີດໂອກາດໃຫ້ພວກເຂົາກັບຄືນມາດຳລົງຊີວິດເປັນປົກກະຕິອຸທິຕົນເຂົ້າໃນການສ້າງສາປະເທດຊາດ.
ຝ່າຍຄ້ານຊີຣີອ້າງວ່າ: ນັບແຕ່ເກີດວິກິດການຊີຣີເປັນຕົ້ນມາ, ລັດຖະບານໄດ້ກັກຊາວຊີຣີນັບເປັນພັນເປັນໝື່ນ ແລະຝ່າຍຕົນກໍໄດ້ຮຽກຮ້ອງມາຫຼາຍເທື່ອແລ້ວໃຫ້ລັດຖະບານປ່ອຍຕົວຄົນເຫຼົ່ານີ້ແລະໃນຊຸມປີມໍ່ໆມານີ້, ລັດຖະບານກໍໄດ້ປ່ອຍນັກໂທດຢູ່ແຫ່ງຕ່າງໆເປັນຈຳນວນຫຼາຍມາແລ້ວຫຼາຍເທື່ອເພື່ອສົ່ງເສີມການສ້າງຄວາມປອງດອງພາຍໃນຊາດ.