ຕາມຂ່າວ CRI: ສື່ມວນຊົນປາກິສະຖານລາຍງານໃນວັນທີ 25 ມິຖຸນານີ້ວ່າ, ຫຼັງລົດຂົນສົ່ງນ້ຳມັນຂວ້ຳແລ້ວເກີດໄຟໄໝ້ຢູ່ເຂດບາຮາວານປູແຂວງປັນຈາບປະເທດປາກິສະຖານສົ່ງຜົນເຮັດໃຫ້ມີຜູ້ເສຍຊີວິດ 140 ຄົນແລະບາດເຈັບ 100 ກວ່າຄົນ, ແນວໃດກໍດີຄາດວ່າຈຳນວນຜູ້ເສຍຊີວິດອາດຈະເພີ່ມຂຶ້ນອີກເນື່ອງຈາກຍັງມີຜູ້ບາດເຈັບສາຫັດຈຳນວນໜຶ່ງ.
ຜູ້ເຫັນເຫດການເວົ້າວ່າ, ອຸບັດຕິເຫດດັ່ງກ່າວເກີດຂຶ້ນໃນເວລາ 6:30 ໂມງເຊົ້າວັນທີ 25 ມິຖຸນານີ້ໂດຍເກີດຈາກລົດຂົນສົ່ງນ້ຳມັນຄັນດັ່ງກ່າວລໍ້ແຕກ, ຂະນະທີ່ປະຊາຊົນຫຼາຍຄົນຂີ່ລົດຈັກໄປບ່ອນເກີດເຫດ, ແລະຕົ່ງນ້ຳມັນທີ່ໄຫຼອອກນັ້ນ, ລົດຄັນດັ່ງກ່າວກໍເກີດໄຟໄໝ້ຢ່າງກະທັນຫັນສົ່ງຜົນເຮັດໃຫ້ປະຊາຊົນເສຍຊີວິດແລະບາດເຈັບເປັນຈຳນວນຫຼາຍ.
ເຈົ້າໜ້າທີ່ຕຳຫຼວດປາວິສະຖານເປີດເຜີຍວ່າ, ເຫດດັ່ງກ່າວຍັງເຮັດໃຫ້ລົດຈັກ 75 ຄັນແລະລົດໃຫຍ່ 6 ຄັນຖືກເສຍຫາຍເຊິ່ງກໍລວມເອົາລົດຕຳຫຼວດໜຶ່ງຄັນນຳດ້ວຍ.
ປັດຈຸບັນ, ເຈົ້າໜ້າທີ່ພວມສືບສວນຫາສາເຫດພາໃຫ້ເກີດໄຟໄໝ້ດັ່ງກ່າວ. ຂະນະທີ່ສື່ມວນຊົນລາຍງານວ່າ, ອາດຈະເກີດຈາກປະຊາຊົນຖິ້ມກິດກອກຢາ.