ໃນໂອກາດເຂົ້າຮ່ວມກອງປະຊຸມເວທີປຶກສາຫາລື "ສັນຕິພາບໂລກ" ຄັ້ງທີ 6 ທີ່ຈັດຂຶ້ນຢູ່ມະຫາວິທະຍາໄລຊິງຫົວ ສປ ຈີນໃນວັນທີ 25 ມິຖຸນານີ້, ທ່ານຫງວຽນວູຕຸງ ຫົວໜ້າສະຖາບັນການຕ່າງປະເທດຫວຽດນາມກ່າວວ່າ, ຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ໄດ້ສ້າງໂອກາດແກ້ໄຂຄວາມຂັດແຍ້ງດ້ານດິນແດນແລະເລີ່ມຂະຫຍາຍສາຍພົວພັນລະຫວ່າງສອງປະເທດຫວຽດນາມແລະຈີນ.
ທ່ານຫງວຽນວູຕຸງກ່າວວ່າ, "ການຮ່ວມມືຈະສ້າງຄວາມໄວ້ເນື້ອເຊື່ອໃຈ, ແລະຄວາມໄວ້ເນື້ອເຊື່ອໃຈຈະສ້າງໂອກາດຮ່ວມມືກຫັນຫຼາຍກວ່າເກົ່າ", "ຄວາມຂັດແຍ້ງດ້ານດິນແດນທີ່ມີມາເປັນເວລາດົນນານແລ້ວ, ຕ້ອງການຄວາມພະຍາຍາມໄລຍະຍາວຈຶ່ງສາມາດແກ້ໄຂໄດ້, ແຕ່ຜົນສຳເລັດຂອງໂຄງການຮ່ວມມືເສດຖະກິດການຄ້າສາມາດກາຍເປັນແບບຢ່າງອັນດີງາມ, ເປັນຂີດໝາຍສະແດງໃຫ້ເຫັນວ່າສອງປະເທດສາມາດຜ່ານຜ່າສິ່ງກີດຂວາງຍ້ອນຄວາມຂັດແຍ້ງກັນດ້ານດິນແດນ".
ໂຮງງານຜະລິດໄຟຟ້າວິງເຕັນທີ່ຕັ້ງຢູ່ແຂວງບິງຖ້ວນປະເທດຫວຽດນາມທີ່ຈີນແລະຫວຽດນາມຮ່ວມມືກໍ່ສ້າງນັ້ນແມ່ນໜຶ່ງໃນໂຄງການແບບຢ່າງພາຍໃຕ້ຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ", ແລະພາຍຫຼັງກໍ່ສ້າງແລ້ວຈະສາມາດສະໜອງພະລັງງານໄຟຟ້າ 8 ຕື້ກິໂລວັດໂມງຕໍ່ປີໃຫ້ແກ່ປະຊາຊົນທ້ອງຖິ່ນດັ່ງກ່າວ. ຂະນະດຽວກັນໂຮງງານຜະລິດໄຟຟ້າດັ່ງກ່າວໄດ້ສ້າງວຽກເຮັດງານທຳໃຫ້ແກ່ປະຊາຊົນທ້ອງຖິ່ນເປັນຈຳນວນຫຼາຍ.
 |
