ທ່ານວຣາດີເມຍ ໂຄຊິນ ຜູ້ຊ່ວຍວຽກການຮ່ວມມືເຕັກນິກການທະຫານຂອງປະທານາທິບໍດີຣັດເຊຍຢືນຢັນຢູ່ນະຄອນຫຼວງມົສກູໃນວັນທີ 26 ມິຖຸນານີ້ວ່າ: ປະເທດຕົນກຳລັງເຈລະຈາກັບ ໄທ,ອິນໂດເນເຊຍແລະຟີລິບປິນກ່ຽວກັບການສະໜອງອາວຸດຍຸດໂທປະກອນກອງທັບເຮືອ.
ທ່ານໂຄຊິນຖະແຫຼງຕໍ່ສື່ມວນຊົນໃນວັນທີ 26 ມິຖຸນານີ້ວ່າ: ເນື່ອງຈາກອາວຸດຍຸດໂທປະກອນຂອງກອງທັບເຮືອຣັດເຊຍມີປະສິດທິພາບສູງໃນສະໜາມຮົບຢູ່ຊີຣີຈິ່ງໄດ້ຮັບຄວາມນິຍົມຈາກປະເທດແຄມທະເລໃນອາຊີ. ສຳລັບສັນຍາການສະໜອງອາວຸດຍຸດໂທປະກອນກອງທັບເຮືອທີ່ຣັດເຊຍໄດ້ເຊັນກັບປະເທດຄູ່ຮ່ວມມືທີ່ມີມູນເຊື້ອເຊັ່ນຫວຽດນາມແລະອິນເດຍຜ່ານມານັ້ນຍັງຄົງປະຕິບັດເໝືອນເດີມ. ນອກນີ້, ຫຼາຍປະເທດຢູ່ແຄມຝັ່ງທະເລໃນອາຟຣິກກາກໍໄດ້ສະເໜີການຮ່ວມມືກັບຣັດເຊຍເຊັ່ນກັນ. ປັດຈຸບັນ, ການສົ່ງອອກອາວຸດຍຸດໂທປະກອນຂອງກອງທັບເຮືອຣັດເຊຍໄດ້ກວມອັດຕາສ່ວນສູງຂຶ້ນຂອງຍອດມູນຄ່າການສົ່ງອອກໂດຍໃນປີ 2016 ຜ່ານມາ, ບັນລຸມູນຄ່າການສົ່ງອອກອາວຸດຍຸດໂທປະກອນທຸກຊະນິດເຖິງ 15 ຕື້ 300 ລ້ານໂດລາສະຫະລັດ, ໃນນີ້, ມູນຄ່າການສົ່ງອອກອາວຸດຍຸດໂທປະກອນກອງທັບເຮືອໄດ້ກວມເຖິງ 7%.
 |
