ກອງປະຊຸມຜູ້ນຳໃໝ່ເວທີປຶກສາຫາລືເສດຖະກິດໂລກຄັ້ງທີ 11ຫຼື ເວທີປຶກສາຫາລືດາວົສລະດູຮ້ອນ2017ໄດ້ຈັດຂຶ້ນຢູ່ສູນປະຊຸມສາກົນຕ້າລຽນ ແຂວງລຽວນິງ ສປ ຈີນໃນວັນທີ 27 ມິຖຸນານີ້ໂດຍແຂກຜູ້ມີກຽດ 2000 ກວ່າທ່ານຈາກ 80 ກວ່າປະເທດເຂົ້າຮ່ວມ, ຂະນະທີ່ທ່ານຫຼີເຄີ້ສຽງ ນາຍົກລັດຖະມົນຕີຈີນໄດ້ກ່າວປາໄສພິເສດໃນພິທີເປີດກອງປະຊຸມດັ່ງກ່າວວ່າ: ເຖິງວ່າປັດຈຸບັນ, ເສດຖະກິດໂລກໄດ້ມີສັນຍານຟື້ນຕົວຄືນ, ແຕ່ກໍຍັງບໍ່ໝັ້ນທ່ຽງເທື່ອເນື່ອງຈາກກຳລັງຊຸກຍູ້ການຟື້ນຕົວຂອງເສດຖະກິດຍັງບໍ່ພຽງພໍ ໂດຍສະເພາະບັນຫາໂຄງປະກອບເສດຖະກິດຍິ່ງພົ້ນເດັ່ນກວ່າເກົ່າລວມທັງບັນຫາການເມືອງພາກພື້ນຍັງມີຄວາມສ່ຽງສູງຂຶ້ນ. ແນວໃດກໍດີ, ຂໍພຽງແຕ່ພວກເຮົາຍຶດໝັ້ນເປົ້າໝາຍຢ່າງເດັດດ່ຽວກໍຈະສາມາດເຮັດໃຫ້ເສດຖະກິດພັດທະນາຢ່າງໝັ້ນທ່ຽງເພື່ອເອົາຊະນະຄວາມບໍ່ແນ່ນອນທີ່ເກີດຂຶ້ນໃນການພັດທະນາເສດຖະກິດ.