ແຜນການ "ຖອນອອກຈາກສະຫະພາບເອີລົບ" ທີ່ທ່ານນາງເທເຣຊາ ເມ ນາຍົກລັດຖະມົນຕີອັງກິດສະເໜີອອກມາໃນກອງປະຊຸມສຸດຍອດລະດູຮ້ອນນັ້ນ ຕ່ຳກວ່າຄວາມຄາດການຂອງສະຫະພາບເອີລົບ ແລະຈາກນີ້ທ່ານມີເຊວ ບາເນຍ ຫົວໜ້າຜູ້ແທນເຈລະຈາ "ຖອນອອກຈາກສະຫະພາບເອີລົບ" ຄະນະກຳມາທິການສະຫະພາບເອີລົບກ່າວໃນວັນທີ 26 ມິຖຸນານີ້ວ່າ, ຫວັງໃຫ້ສຳນັກນາຍົກອັງກິດສະເໜີແຜນການ ທີ່ຈະແຈ້ງ ແລະເດັດດ່ຽວກວ່າເກົ່າ.
ກ່ອນໜ້ານີ້ສື່ມວນຊົນວິເຄາະວ່າ, ເນື່ອງຈາກອັງກິດແລະສະຫະພາບເອີລົບມີຄວາມຂັດແຍ້ງໃນບັນຫາການ "ຖອນອອກຈາກສະຫະພາບເອີລົບ" ຂອງອັງກິດ, ສະນັ້ນ, ການເຈລະຈາກ່ຽວກັບບັນຫານີ້ຈະຫຍຸ້ງຍາກລຳບາກທີ່ສຸດ. ທັງນີ້ ເມື່ອວັນທີ 29 ມີນາຜ່ານມາ, ທ່ານນາງເທເຣຊາ ເມ ໄດ້ສົ່ງຈົດໝາຍໃຫ້ສະຫະພາບເອີລົບ ແລະເລີ່ມຂັ້ນຕອນ "ຖອນອອກຈາກສະຫະພາບເອີລົບ" ຢ່າງເປັນທາງການ ເຊິ່ງອີງຕາມ "ສັນຍາລິສບອນ", ການເຈລະຈາ "ຖອນອອກຈາກສະຫະພາບເອີລົບ" ຄວນສຳເລັດກ່ອນວັນທີ 29 ມີນາ ປີ 2019.
 |
