ວັນທີ 27 ມິຖຸນານີ້, ລັດຖະບານຟີລິບປິນໄດ້ປະຕິເສດເງື່ອນໄຂແລກປ່ຽນຕົວປະກັນທີ່ກຸ່ມມາວເຕ ເຊິ່ງເປັນກຸ່ມປະກອບອາວຸດຕໍ່ຕ້ານລັດຖະບານໄດ້ສະເໜີກ່ອນໜ້ານີ້ ທັງຢືນຢັນວ່າ ມັນເປັນໄປບໍ່ໄດ້ທີ່ຈະເຈລະຈາກັບຜູ້ກໍ່ການຮ້າຍ.
ຂ່າວແຈ້ງວ່າ: ໃນການເຈລະຈາ, ກຸ່ມມາວເຕສະເໜີໃຫ້ ປ່ອຍຕົວບາດຫຼວງສາສະໜາໂລມັນກາໂຕລິກຜູ້ໜຶ່ງແລກກັບການໃຫ້ລັດຖະບານປ່ອຍພໍ່ແມ່ແລະຍາດພີ່ນ້ອງຂອງຫົວໜ້າກຸ່ມມາວເຕ. ຈາກນີ້, ທ່ານເອີເນັສໂຕ ອາເບນລາ ໂຄສົກປະທານາທິບໍດີຟີລິບປິນຖະແຫຼງໃນວັນທີ 27 ມິຖຸນານີ້ວ່າ: ລັດຖະບານປະຕິບັດນະໂຍບາຍບໍ່ເຈລະຈາກັບກຸ່ມກໍ່ການຮ້າຍ ແລະການເຈລະຈາຊ່ວຍເຫຼືອຕົວປະກັນເທື່ອນີ້ບໍ່ແມ່ນລັດຖະບານຫຼືກອງທັບຈັດຂຶ້ນ. ດ້ວຍເຫດນີ້, ທຸກຂໍ້ຮຽກຮ້ອງຂອງກຸ່ມມາວເຕລ້ວນແຕ່ບໍ່ມີຫຼັກອ້າງອີງເຊິ່ງກຸ່ມກໍ່ການຮ້າຍພ້ອມຜູ້ສະໜັບສະໜູນຕ້ອງຮັບຜິດຊອບຕໍ່ການກະທຳຂອງເຂົາເຈົ້າເອງ.
ຕົ້ນເດືອນມິຖຸນານີ້, ກອງທັບຟີລິບປິນໄດ້ຈັບພໍ່ແມ່ຂອງຫົວໜ້າກຸ່ມມາວເຕໃນຂໍ້ຫາເປັນກະບົດຢູ່ພາກໃຕ້ຟີລິບປິນ ທັງນຳໄປຂັງຢູ່ນະຄອນຫຼວງມະນີລາ.
 |
