ວັນທີ 26 ມິຖຸນານີ້, ທ່ານ ຊຸຕິມາ ມຸນຍາພະພາຊາຣາ ຮອງຫົວໜ້າຫ້ອງການກະຊວງການຄ້າໄທໄດ້ໃຫ້ຮູ້ວ່າ: ກະຊວງຂອງຕົນພວມຊຸກຍູ້ນັກລົງທຶນປະເທດຕົນກັບນັກລົງທຶນ ແລະກຸ່ມບໍລິສັດການຄ້າທີ່ສຳຄັນຫຼາຍແຫ່ງຂອງກຳປູເຈຍ, ລາວ ,ມຽນມາແລະຫວຽດນາມ ເພື່ອສ້າງໂອກາດການລົງທຶນໃຫ້ຫຼາຍກວ່າເກົ່າ.
ນອກນີ້, ທ່ານ ຊຸຕິມາ ໃຫ້ຮູ້ອີກວ່າ: ລັດຖະບານໄທໄດ້ວາງນະໂຍບາຍທີ່ເປັນບຸລິມະສິດຕ່າງໆຕໍ່ແລວເສດຖະກິດຢູ່ພາກຕາເວັນອອກຂອງປະເທດຕົນຫຼື EEC ເພື່ອເພີ່ມມູນຄ່າການລົງທຶນແລະການຄ້າລະຫວ່າງໄທກັບບັນດາປະເທດໃກ້ຄຽງໃຫ້ສູງຂຶ້ນ. ກ່ອນໜ້ານີ້, ທ່ານ ສົມຄິດ ຈາຕຸສີພິທັກ ຮອງນາຍົກລັດຖະມົນຕີໄທໄດ້ໃຫ້ຮູ້ໃນວັນທີ 19 ມິຖຸນານີ້ວ່າ:ປະເທດຕົນໄດ້ເລີ່ມວາງແຜນການລວມກ່ຽວກັບການຊຸກຍູ້ການພົວພັນຮ່ວມມືການຄ້າແລະການລົງທຶນກັບກຳປູເຈຍ,ມຽນມາ,ລາວແລະຫວຽດນາມ ເພື່ອຄວາມຈະເລີນກ້າວໜ້າຮ່ວມກັນຂອງ 5 ປະເທດ.
ປີ 2016, ຍອດມູນຄ່າການຄ້າລະຫວ່າງໄທກັບ 4 ປະເທດດັ່ງກ່າວບັນລຸເຖິງ 30 ຕື້ 940 ລ້ານໂດລາສະຫະລັດ. ໃນນີ້ມູນຄ່າການຄ້າລະຫວ່າງໄທ-ຫວຽດນາມຢູ່ອັນດັບ 1 ເຊິ່ງບັນລຸເຖິງ 13 ຕື້ 850 ລ້ານໂດລາສະຫະລັດ,ຖັດມາແມ່ນມຽນມາ,ກຳປູເຈຍແລະລາວ.