ເຈົ້າໜ້າທີ່ອົງການທ່ອງທ່ຽວແຫ່ງຊາດຟີລິບປິນປະຈຳນະຄອນຫຼວງປັກກິ່ງເປີດເຜີຍ ທີ່ນະຄອນຖ່ຽນສິນໃນວັນທີ 28 ມິຖຸນານີ້ວ່າ, ຊຸມປີຜ່ານມາ, ເນື່ອງຈາກວ່າສາຍພົວພັນລະຫວ່າງລັດຖະບານສອງປະເທດຈີນຟີລິບປິນນັບມື້ແໜ້ນແຟ້ນແລະດີຂຶ້ນ, ຟີລິບປິນຈິ່ງໄດ້ກາຍເປັນຈຸດໝາຍປາຍທາງການທ່ອງທ່ຽວທີ່ໄດ້ຮັບຄວາມນິຍົມຊົມຊອບຂອງນັກທ່ອງທ່ຽວຈີນ ແລະກໍເພີ່ມຂຶ້ນແບບບໍ່ເຄີຍມີມາກ່ອນ ໂດຍເຫັນໄດ້ປີຜ່ານມາເພີ່ມຂຶ້ນ 38% ແລະພຽງໄຕມາດທຳອິດຂອງປີນີ້ກໍໄດ້ເພີ່ມຂຶ້ນເຖິງ 31%ແລ້ວ.
ເຈົ້າໜ້າທີ່ອົງການທ່ອງທ່ຽວແຫ່ງຊາດຟີລິບປິນເປີດເຜີຍຕື່ມວ່າ, ປີຜ່ານມາ, ນັກທ່ອງທ່ຽວຈີນໄປທ່ຽວຟີລິບປິນມີເຖິງ 6 ແສນ 7 ໝື່ນ 5 ພັນ 700 ເທື່ອຄົນ ເພີ່ມຂຶ້ນຫຼາຍກວ່າໄລຍະດຽວກັນຂອງປີຜ່ານມາ 37,7% ແລະໄດ້ຮັກສາຈັງຫວະເຕີບໂຕໄວກວ່າໝູ່ ຄືຫຼາຍກວ່ານັກທ່ອງທ່ຽວຍີ່ປຸ່ນ ແລະກາຍເປັນແຫຼ່ງນັກທ່ອງທ່ຽວໃຫຍ່ອັນດັບ 3 ຂອງຟີລິບປິນ.
ເຈົ້າໜ້າທີ່ທ່ານນີ້ກ່າວຕື່ມວ່າ, ຕໍ່ໜ້າ ເຊິ່ງນອກຈາກປັກກິ່ງແລ້ວ, ຈະເພີ່ມທະວີການໂຄສະນາຢູ່ຕົວເມືອງໃຫຍ່ອື່ນໆຂອງຈີນ ທັງຈະສືບຕໍ່ປັບປຸງຜະລິດຕະພັນແລະການບໍລິການຂອງການທ່ອງທ່ຽວໃຫ້ດີຂຶ້ນ ເພື່ອຕອບສະໜອງຄວາມຕ້ອງການຂອງນັກທ່ອງທ່ຽວຈີນໃຫ້ໄດ້ດີກວ່າເກົ່າ.