ອູແກຣນໄດ້ຮັບຜົນເສຍຫາຍຈາກໄວລັດຮຽກຄ່າໄຖ່ຄອມພິວເຕີຊະນິດໜຶ່ງທີ່ມີລະຫັດວ່າ "Petya"ໃນວັນທີ 27 ມິຖຸນານີ້ໂດຍຊ່ຽວຊານກ່າວວ່າ ການແຜ່ລະບາດຂອງໄວລັດດັ່ງກ່າວຄ້າຍຄືກັບໄວລັດຮຽກຄ່າໄຖ່ "Wannacry"ທີ່ເກີດຂຶ້ນກ່ອນໜ້ານີ້. ນອກຈາກອູແກຣນແລ້ວ, ໃນວັນດັ່ງກ່າວ, ຫຼາຍປະເທດເຊັ່ນຣັດເຊຍ,ຝຣັ່ງ,ອັງກິດແລະປະເທດອື່ນໆກໍໄດ້ຖືກໄວລັດໂຈມຕີເຊັ່ນກັນ ແລະມີທ່າອ່ຽງຈະແຜ່ລະບາດກວ້າງອອກ, ໃນນີ້,ອູແກຣນໄດ້ຮັບຜົນເສຍຫາຍຫຼາຍກວ່າໝູ່.
ສື່ມວນຊົນອູແກຣນລາຍງານວ່າ: ໜ່ວຍງານທຳອິດທີ່ໄດ້ຮັບຜົນກະທົບຈາກໄວລັດນັ້ນຄືທະນາຄານກາງ, ຈາກນັ້ນກໍແມ່ນບໍລິສັດເຄືອຂ່າຍໄຟຟ້າ, ທະນາຄານ, ອົງການຈັດຕັ້ງລັດຖະບານ,ສະໜາມບິນແລະພາກສ່ວນອື່ນໆກໍໄດ້ຖືກໄວລັດໂຈມຕີເຊັ່ນກັນ. ຂະນະທີ່ລັດຖະກອນຈຳນວນໜຶ່ງໄດ້ຖືກຮຽກໃຫ້ຈ່າຍຄ່າໄຖ່ດ້ວຍສະກຸນເງິນບິດຄອນ(Bitcoin).
ເຈົ້າໜ້າທີ່ຕຳຫຼວດອູແກຣນເຜີຍໃຫ້ຮູ້ໃນວັນທີ 28 ມິຖຸນານີ້ວ່າ: ໄດ້ຮັບໂທລະສັບແຈ້ງ ກ່ຽວກັບຄອມພິວເຕີຖືກຮຽກຄ່າໄຖ່ເກືອບ 200 ກໍລະນີ. ທ່ານວໍລໍດີເມຍ ໂກຣອິສມານ ນາຍົກລັດຖະມົນຕີອູແກຣນຢືນຢັນວ່າ ການໂຈມຕີຂອງໄວລັດເທື່ອນີ້ມີຄວາມຮຸນແຮງແບບບໍ່ເຄີຍມີມາກ່ອນ, ແຕ່ລະບົບສຳຄັນສ່ວນຫຼາຍບໍ່ໄດ້ຮັບຜົນເສຍຫາຍໜັກໜ່ວງພໍເທົ່າໃດ.
