ທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນ, ປະທານປະເທດ, ປະທານຄະນະກຳມະການການທະຫານສູນກາງຈີນໄດ້ເດີນທາງເຖິງຮົງກົງດ້ວຍເຮືອບິນພິເສດໃນວັນທີ 29 ມິຖຸນານີ້ເພື່ອເຂົ້າຮ່ວມພິທີສະຫຼອງວັນຮົງກົງກັບຄືນປະເທດຊາດຄົບຮອບ 20 ປີ ແລະພິທີສາບານຕົວຂຶ້ນຮັບຕຳແໜ່ງຂອງຄະນະອົງການປົກຄອງເຂດບໍລິຫານພິເສດຮົງກົງຊຸດທີ 5 ໃນວັນທີ 1 ກໍລະກົດທີ່ຈະມາເຖິງ.
ທ່ານສີຈິ້ນຜິງຢືນຢັນວ່າ ການເດີນທາງຢ້ຽມຢາມເທື່ອນີ້ມີ 3 ເປົ້າໝາຍຄື ໜຶ່ງ ສະແດງຄວາມອວຍພອນແລະຊົມເຊີຍຜົນສຳເລັດອັນໃຫຍ່ຫຼວງທີ່ເຂດບໍລິຫານພິເສດຮົງກົງຍາດມາໄດ້ຕະຫຼອດໄລຍະ 20 ປີມານີ້ຢ່າງສຸດໃຈທັງອວຍພອນຢ່າງຈິງໃຈໃຫ້ຮົງກົງປະສົບຜົນສຳເລັດຍິ່ງໃຫຍ່ກວ່າເກົ່າ. ສອງ ເພື່ອສະແດງໃຫ້ເຫັນການສະໜັບສະໜູນຮົງກົງເຊິ່ງຕະຫຼອດໄລຍະ 20 ປີຜ່ານມາ, ລັດຖະບານກາງສືບຕໍ່ເປັນເສົາຄ້ຳທີ່ເຂັ້ມແຂງເພື່ອຊຸກຍູ້ການພັດທະນາຂອງຮົງກົງ ແລະຈະສືບຕໍ່ສະໜັບສະໜູນຮົງກົງພັດທະນາເສດຖະກິດແລະປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນເໝືອນດັ່ງຜ່ານມາ. ສາມ ເພື່ອວາງແຜນອະນາຄົດ ໂດຍຈະຮ່ວມກັບວົງການຕ່າງໆໃນຮົງກົງທົບທວນຄືນຂະບວນວິວັດອັນໂດດເດັ່ນໃນໄລຍະ 20 ປີຜ່ານມາ, ສະຫຼຸບບົດຮຽນ, ວາງແຜນ ເພື່ອຮັບປະກັນໃຫ້ນະໂຍບາຍ "ປະເທດໜຶ່ງສອງລະບອບ"ໄດ້ຮັບການປະຕິບັດຢ່າງໜັກແໜ້ນແລະບັນລຸຕາມເປົ້າໝາຍ.
ທ່ານສີຈິ້ນ ຫວັງຈະໄດ້ສຳຜັດກັບການປ່ຽນແປງໃໝ່ຂອງຮົງກົງໃນຫຼາຍປີຜ່ານມາດ້ວຍຕົນເອງ ແລະເຊື່ອວ່າ ຈາກການເຂົ້າຮ່ວມກິດຈະກຳຕ່າງໆຢູ່ຮົງກົງຈະສາມາດເພີ່ມຄວາມໝັ້ນໃຈໃນການສ້າງສາພັດທະນາຮົງກົງໄດ້ເປັນຢ່າງດີ.