ທ່ານຢາງເຈສື ທີ່ປຶກສາແຫ່ງລັດຈີນ ໄດ້ພົບປະກັບທ່ານອາລານ ປີເຕີ ຄາເຢຕາໂນ ລັດຖະມົນຕີກະຊວງການຕ່າງປະເທດຟິລິບປິນ ຢູ່ນະຄອນຫຼວງປັກກິ່ງໃນວັນທີ 28 ມິຖຸນານີ້.
ທ່ານຢາງເຈສື ກ່າວວ່າ: ໜຶ່ງປີຜ່ານມາ, ສາຍພົວພັນລະຫວ່າງຈີນແລະຟິລິບປິນໄດ້ຮັບການປັບປຸງດີຂຶ້ນຢ່າງຮອບດ້ານ ແລະມີທ່າອ່ຽງພັດທະນາເຂົ້າສູ່ລວງເລິກຢ່າງຮອບດ້ານ. ຂະນະທີ່ໃນຕໍ່ໜ້າ, ສອງຝ່າຍຄວນເພີ່ມທະວີຄວາມໄວ້ເນື້ອເຊື່ອໃຈທາງການເມືອງຕື່ມອີກ ແລະ ເຊື່ອມຕໍ່ຍຸດທະສາດການພັດທະນາ, ລົງເລິກການຮ່ວມມືໃນຂົງເຂດຕ່າງໆຢ່າງຮອບດ້ານ, ຮັກສາການພົວພັນແລະແລກປ່ຽນບັນຫາທາງທະເລໃຫ້ດີ ເພື່ອຊຸກຍູ້ສາຍພົວພັນລະຫວ່າງສອງປະເທດໃຫ້ພັດທະນາກ້າວໜ້າຢ່າງໝັ້ນທ່ຽງ ແລະ ໜັກແໜ້ນ. ຂະນະທີ່ຈີນກໍຈະສະໜັບສະໜູນຟິລິບປິນປະຕິບັດໜ້າທີ່ເປັນປະທານໝູນວຽນອາຊຽນໃນປີນີ້ເຊັ່ນດຽວກັນ.
ທ່ານຄາເຢຕາໂນ ກ່າວວ່າ: ຟິລິບປິນຊົມເຊີຍຈີນທີ່ໄດ້ຕັ້ງໜ້າເສີມຂະຫຍາຍບົດບາດຮັກສາການພັດທະນາໂດຍສັນຕິແລະໝັ້ນທ່ຽງຂອງພາກພື້ນ, ຍິນດີຮ່ວມກັບຈີນຊຸກຍູ້ສາຍພົວພັນລະຫວ່າງສອງປະເທດ ແລະ ການຮ່ວມມືຂອງພາກພື້ນໃຫ້ໄດ້ຮັບການພັດທະນາໃຫຍ່ຫຼວງກວ່າເກົ່າ ໂດຍຖືເອົາການສ້າງ "ໜຶ່ງແລວທາງໜຶ່ງເສັ້ນທາງ" ເປັນໂອກາດ.